सोलापूर महानगरपालिका अंतर्गत मराठी मुलांची शाळा क्रमांक 28 सुंदरम् नगर विजापूर रोड येथे 26 जानेवारी 2026 रोजी 77 वा प्रजासत्ताक दिन साजरा करण्यात आला होता. मात्र या कार्यक्रमात भारतीय संविधानाचे शिल्पकार भारतरत्न डॉ. बाबासाहेब आंबेडकर यांचे स्मरण व प्रतिमेला अभिवादन न झाल्याचे निदर्शनास आल्याने नागरिकांमध्ये नाराजी व्यक्त करण्यात आली होती.
या पार्श्वभूमीवर सम्यक क्रांती मागासवर्गीय बहुउद्देशीय संस्था संस्थापक अध्यक्ष यशवंत भाऊ गायकवाड व सामाजिक कार्यकर्ते अतुल भाऊ नागटिळक यांनी 27 जानेवारी रोजी शाळेला भेट देत मुख्याध्यापकांना याबाबत जाब विचारला. प्रजासत्ताक दिन हा संविधान लागू झाल्याचा दिवस असून, त्या दिवशी संविधान निर्माते डॉ. बाबासाहेब आंबेडकर यांचे विचार व कार्य विद्यार्थ्यांपर्यंत पोहोचवणे अत्यावश्यक असल्याचे त्यांनी स्पष्ट केले.
शाळेत डॉ. बाबासाहेब आंबेडकर यांच्या प्रतिमेस अभिवादन करण्यात आले तसेच भारतीय संविधानाच्या उद्देशिकेचे वाचन करण्यात आले. यावेळी विद्यार्थ्यांना संविधानाचे महत्त्व व मूल्ये समजावून सांगण्यात आली.
या प्रसंगी मुख्याध्यापकांनी सदर बाब ही दुर्लक्षामुळे झाल्याचे मान्य करत, आपली चूक स्वीकारली व भविष्यात अशा प्रकारची चूक होणार नाही, अशी ग्वाही दिली. तसेच त्यांनी या बाबीबद्दल सर्व भारतीय नागरिकांची जाहीर माफी मागितली.
याप्रसंगी संस्थेचे किशोर चंदनशिवे, भास्कर देडे, सागर साबळे, अभिजीत गायकवाड, केदारनाथ छत्रे, अनिल शिंदे, विश्वजीत गायकवाड, मिथुन कोंडूर,अनुराग देडे, सम्राट गायकवाड, संदिप गायकवाड, सुरेश जाधव, आदी पदाधिकारी कार्यकर्ते उपस्थित होते.
या घटनेमुळे संविधानिक मूल्यांचे महत्त्व पुन्हा अधोरेखित झाले असून, नागरिकांच्या सजगतेमुळे शाळेत योग्य ती दुरुस्ती करण्यात आल्याची भावना व्यक्त होत आहे.
