सोलापूर : पत्नीला कोरोना विषाणूची बाधा झाल्याची संधी साधत एका व्यक्तीनं आपल्या पत्नीचा अमानुष छळ केल्याची धक्कादायक घटना समोर आली आहे. पीडित महिलेला वेळेवर उपचार मिळू नयेत म्हणून आरोपीने नको तो उपद्व्याप केला आहे. आरोपीने कोरोनाची बाधा झाल्यानंतर बरेच दिवस पीडितेला उपचारापासून वंचित ठेवल्याने पीडितेचा मृत्यू झाला आहे. याप्रकरणी पोलिसांनी नातेवाईकांच्या तक्रारीनंतर संबंधित व्यक्तीवर मनुष्यवधाचा गुन्हा दाखल केला आहे.
या घटनेचा पुढील तपास पोलीस करत आहेत.लिंगराज दामू पवार असे आरोपी पतीचे नाव असून तो मंगळवेढा येथील तुकाई नगर परिसरातील रहिवासी आहे. आरोपी पवार सध्या कर्नाटकच्या वैद्यकीय खात्यात नोकरीला आहे. पोलिसांनी दिलेल्या माहितीनुसार, 2005 साली आरोपी लिंगराज याचं मृत अश्विनी यांच्यांशी विवाह झाला होता. लग्नानंतर अश्विनी यांनी एका मुलीला जन्म दिला होता. मुलगा न झाल्याने आरोपी पीडितेवर नाराज झाला होता. यामुळे त्याने पीडितेकडे घटस्फोटाची मागणी केली होती.पण पत्नी अश्विनी यांनी घटस्फोट द्यायला नकार दिला. दरम्यान एप्रिल महिन्याच्या पहिल्या आठवड्यात अश्विनी यांना कोरोना विषाणूची लागण झाली. पत्नीचा कोरोनामुळे मृत्यू व्हावा, म्हणून आरोपीने अश्विनी यांना वेळेवर उपचारासाठी दाखल केले नाही. नातेवाईकांच्या दबावापोटी तिला बेळगाव याठिकाणी उपचारासाठी दाखल केलं. पण तोपर्यंत फार उशीर झाला होता. याठिकाणी उपचार सुरू असताना अश्विनी यांनी अखेरचा श्वास घेतला आहे. याप्रकरणी मृत अश्विनी यांच्या नातेवाईकांनी आरोपी लिंगराज पवार याच्याविरोधात मंगळवेढा पोलीस ठाण्यात सदोष मनुष्यवधाचा गुन्हा दाखल केला आहे. या प्रकरणाचा पुढील तपास पोलीस करत आहेत.
