सोलापूर (प्रतिनिधी) – सोलापुरातील सर्वात जुन्या शाळांपैकी एक अशा रावजी सखाराम हायस्कुल या शाळेत हरित वसुंधरा फाउंडेशनच्या वतीने ४/२/२०२३ रोजी संध्याकाळी ७ ते ९.३० या कालावधीत “आकाश निरीक्षण” हा उपक्रम राबविण्यात आला.
या उपक्रमाच्या माध्यमातून उपस्थित विद्यार्थी आणि शिक्षक यांना दूरदर्शी दुर्बीण आणि व्ही आर बॉक्स या आधुनिक तंत्रज्ञानाच्या जोडीने अवकाशाची सफर घडवून आणली. दुर्बिणीने चंद्राचा पृष्ठभाग प्रत्यक्ष पाहण्याचा आणि व्ही आर बॉक्स मधून आभासी पद्धतीने ग्रहावर फिरण्याचा अनुभव यावेळी सर्वांनी घेतला. याचबरोबर संस्थेचे अध्यक्ष अमित बनसोडे यांनी अवकाश, सूर्यमाला, ग्रह व तारे, गुरुत्वाकर्षण शक्ती व आकाश निरीक्षण कसे करायचे या बद्दल मार्गदर्शन केले. सदर उपक्रमास विद्यार्थ्यांचा उत्स्फूर्त प्रतिसाद मिळाला. चंद्रावरील काळे ठिपके म्हणजे डाग नसून चंद्राच्या पृष्ठभागावरील मोठ मोठे खड्डे असल्याचे आज आम्हाला पाहता आले अशी सुंदर प्रतिक्रिया विद्यार्थ्यांनी दिली. अशा उपक्रमांमुळे सोलपूरतून ही नासा, इसरो यांसारख्या अवकाश केंद्रात जाऊन काम करण्याची प्रेरणा विद्यार्थ्यांना मिळेल असा विश्वास शाळेतील उपस्थित शिक्षकांनी व्यक्त केला.
यावेळी शाळेचे वसंत नागणे,अण्णा दिक्षित, सुवर्णमाला आधटराव, संतोष वालवडकर, महावीर आळंदकर, सुनीता पाटील, अविनाश शिंदे हे शिक्षक उपस्थित होते. हा उपक्रम यशस्वी करण्यासाठी फाऊंडेशनच्या वतीने रोहन खंदारे,अजय आलटे, विद्या थोरात, सागर संभारम, प्रतीक भडकुंबे, विलास गंजगी आणि संबिनी बनसोडे यांनी परिश्रम घेतले. अवकाश निरीक्षण हा उपक्रम राबविण्यासाठी इच्छुकांनी फाउंडेशनशी संपर्क साधावा असे आवाहन यावेळी करण्यात आले.