सिद्धेश्वर यात्रेबाबत आमदार देशमुखांनी केले मनपा आयुक्तांशी चर्चा
सोलापूर (३ डिसेंबर) – अवघ्या दीड महिन्यांनंतर सोलापूरचे ग्रामदैवत श्री सिद्धेश्वर यात्रा येणार असून याबाबत शासनाने घालून दिलेल्या सर्व नियमांचे पालन करून यात्रा साजरी करण्यात येईल. त्यामुळे ग्रामदैवत सिद्धरामेश्वर महाराजांची यात्रा साजरी करण्यास प्रशासनाने परवानगी द्यावी अशी विनंती आमदार विजयकुमार देशमुख यांनी मनपा आयुक्त पी. शिवशंकर यांच्याकडे केली आहे. यावेळी सिद्धेश्वर यात्रेचे प्रमुख मानकरी राजशेखर हिरेहब्बू, नगरसेवक शिवानंद पाटील, नागेश भोगडे, विनायक विटकर, राजकुमार पाटील आदी उपस्थित होते.
कोरोना मारामारीच्या पार्श्वभूमीवर यंदा सोलापूरचे ग्रामदैवत सिद्धरामेश्वर महाराजांची यात्रा होईल का नाही यासंदर्भात भक्तांमध्ये तर्कवितर्क वर्तविण्यात येत असून आमदार विजयकुमार देशमुख यांनी मनपा आयुक्तांची भेट घेऊन सविस्तरपणे चर्चा करुन शासनाने घालून दिलेल्या सर्व नियमांचे पालन करून यात्रा साजरी करण्यात येईल. त्यामुळे ग्रामदैवत सिद्धरामेश्वर महाराजांची यात्रा साजरी करण्यास प्रशासनाने परवानगी द्यावी, अशी विनंती यावेळी प्रशासनाला करण्यात आली.
यावर मनपा आयुक्त पी. शिवशंकर यांनी जिल्हाधिकारी, पोलीस आयुक्त यांच्यासमवेत बैठक घेऊन निर्णय घेणार असल्याचे शिष्टमंडळास सांगितले आहे. त्यामुळे आता सिद्धेश्वर यात्रेबाबत मनपा आयुक्त, जिल्हाधिकारी आणि पोलीस आयुक्त यांच्या बैठकीत काय ठरणार हे पाहणे महत्वाचे ठरले.
