येस न्युज नेटवर्क : महाराष्ट्रात फोडाफोडीचे राजकारण जोरात असताना केरळमध्येही काँग्रेसला मोठा धक्का बसण्याची शक्यता आहे. ज्येष्ठ नेते शशी थरूर काँग्रेसशी काडीमोड घेण्याची चर्चा आहे. ते राष्ट्रवादी काँग्रेसमध्ये जाण्याची शक्यता असून राष्ट्रावादीचे केरळमधील अध्यक्ष पी. सी. चाको यांनीही तसे संकेत दिले आहेत. राष्ट्रवादी काँग्रेसमधील प्रवेशाची शक्यता शशी थरूर यांनी फेटाळली. आपण राष्ट्रवादी काँग्रेसमध्ये जाणार नाही. पी. सी. चाको यांच्याशी यासंदर्भात माझी कोणतीही चर्चा झालेली नाही, असे त्यांनी स्पष्ट केले. यापूर्वी देखील त्यांनी नाराज असल्याचे वृत्त फेटाळले होते.
काँग्रेसमध्ये अध्यक्षपदाची निवडणूक झाल्यापासून शशी थरूर यांच्याकडे पक्षात दुर्लक्ष होत असल्याची बोलले जात आहे. मल्लिकार्जुन खर्गे अध्यक्ष झाल्यानंतर थरूर यांना मोठ्या निर्णयांपासून दूर ठेवले जात आहे, त्यामुळे थरूर नाराज झाले आहेत, असेही सांगण्यात येते. काँग्रेस पक्षाध्यक्षपदासाठी झालेल्या निवडणुकीत मल्लिकार्जुन खर्गे आणि थरूर एकमेकांविरोधात रिंगणात उतरले होते. खर्गे यांनी काँग्रेस खासदार शशी थरूर यांचा मोठ्या फरकाने पराभव केला. या निवडणुकीत खर्गे यांना 7 हजार 897, तर थरूर यांना 1 हजार 72 मते मिळाली होती. त्यानंतर थरूर यांना काँग्रेसच्या विविध उच्चस्तरीय समित्यांमध्येही स्थान मिळाले नाही.
