माढा : ऐन लोकसभा निवडणुकीच्या तोंडावर संजय कोकाटे अखेर राष्ट्रवादी काँग्रेस शरदचंद्र पवार पक्षाची ‘तुतारी’ हाती घेणार असून, आगामी तीन-चार दिवसांत ते कार्यकर्त्यांसह राष्ट्रवादी काँग्रेस शरदचंद्र पवार पक्षात प्रवेश करणार आहेत.
शिवसेना माढा लोकसभा मतदारसंघाचे संपर्कप्रमुख असलेले संजय कोकाटे यांनी १४ मार्च रोजी आपल्या पदाचा व शिवसेनेच्या सदस्यत्वाचा राजीनामा देऊन आपण भाजपचा प्रचार करणार नसल्याचे सोलापूर येथे पत्रकार परिषद घेऊन जाहीर केले होते. तेव्हापासून संजय कोकाटे यांची भविष्यातील राजकीय वाटचाल काय असेल? ते कोणत्या पक्षात प्रवेश करणार? याची माढा तालुक्यात चर्चा चालू होती
सोमवारी (ता. १) सकाळी संजय कोकाटे यांनी आपली पुढील राजकीय भूमिका काय असेल, याबद्दलची एक क्लिप समाज माध्यमावर व्हायरल केली आहे. त्यात त्यांनी म्हटले आहे, की मी पंधरा दिवसांपूर्वी शिवसेना पक्षाचा राजीनामा दिला होता व कार्यकर्त्यांशी विचारविनिमय करून पुढील निर्णय घेतो, असं सांगितलं होतं. विचार विनिमयानंतर मी शरद पवार यांच्या राष्ट्रवादी काँग्रेस पक्षात प्रवेश करायच्या निर्णयापर्यंत आलेलो आहे. येत्या तीन-चार दिवसांत प्रवेश करणार आहे.