मुंबई : केंद्रीय मंत्री नितीन गडकरी यांच्या आजपर्यंतच्या वाटचालीवर चित्रपट तयार करण्यात आला आहे. गडकरी असं चित्रपटाचं नाव असून हा चित्रपट २७ ऑक्टोबरला प्रदर्शित होणार आहे. नितीन गडकरी यांची ओळख बेधडक बोलणारा नेता आणि धडाकेबाज निर्णय घेणारे म्हणून आहे. देशात रस्ते वाहतूक आणि महामार्गांसाठी नितीन गडकरी यांनी सर्वाधिक काळ काम केलंय. हायवे मॅन ऑफ इंडिया म्हणूनही त्यांना ओळखलं जातं. त्यांच्या आजपर्यंतच्या आयुष्यावर गडकरी हा चित्रपट प्रेक्षकांच्या भेटीला येणार आहे.
गडकरी, या चित्रपटाचे पोस्टर सोशल मीडियावर शेअर करण्यात आले आहे. अक्षय देशमुख फिल्म्सने तयार केलेल्या या चित्रपटाचे निर्माते अक्षय अनंत देशमुख हे आहेत. तर चित्रपटाची कथा, पटकथा आणि दिग्दर्शन अनुराज राजन भुसारी यांनी केलंय. दरम्यान, गडकरींची भूमिका कोणी साकारलीय हे अद्याप गुलदस्त्यात आहे. या प्रमुख भूमिकेत कोण याची उत्सुकता सर्वांनाच लागून राहिली आहे.
