सोलापूर, दि.20- पुण्यश्लोक अहिल्यादेवी होळकर सोलापूर विद्यापीठाच्या शैक्षणिक वर्ष 2019 -20 मधील एमफिल, पीएच. डीच्या कोर्स वर्क परीक्षेसाठी अर्ज स्वीकारण्याच्या प्रक्रियेला सुरुवात झाल्याची माहिती परीक्षा व मूल्यमापन मंडळाचे प्रभारी संचालक सीए श्रेणीक शहा यांनी दिली.
एमफिल, पीएच. डी. अभ्यासक्रमासाठी प्रवेश घेऊन एक वर्षे पूर्ण झालेल्या विद्यार्थ्यांनाच कोर्स वर्कसाठी परीक्षा अर्ज भरता येणार आहे. फेब्रुवारी-मार्च 2021 मध्ये या परीक्षा होणार आहेत. त्यासाठी विद्यापीठाच्या su.digitaluniversity.ac या संकेतस्थळावरून अर्ज घेऊन तो पूर्णपणे भरून त्यावर आपल्या मार्गदर्शक आणि संबंधित संशोधन केंद्राच्या व महाविद्यालयातील प्राचार्यांच्या स्वाक्षरीसह व शिक्क्यासह विहित शुल्क भरुन विद्यापीठाकडे जमा करणे आवश्यक आहे.
18 जानेवारी 2021 पासून फॉर्म भरण्यास सुरुवात झाली असून 31 जानेवारीपर्यंत विनाविलंब शुल्क भरून अर्ज जमा करता येणार आहे. विलंब शुल्कासह 18 फेब्रुवारी 2021 तर अतिविलंब शुल्कासहित 15 फेब्रुवारी 2021 पर्यंत अर्ज सादर करता येणार आहे. संबंधित विद्यार्थ्यांनी लवकरात लवकर अर्ज सादर करावे, असे आवाहन विद्यापीठ प्रशासनाकडून करण्यात आले आहे.
