सामान्यांना नाही तर व्हि.व्हि.आय.पींना पण विमानसेवा कायमस्वरूपी बंद करा – सोलापुरकरांची संतप्त प्रतिक्रिया
येस न्युज मराठी नेटवर्क ; गेल्या अनेक वर्षांपासूनच्या अभ्यासपूर्ण आणि सनदशीर मार्गाने सोलापूरातील विविध क्षेत्रातील संस्था, संघटना आणि व्यक्ती यांचा वतीने होटगी रोड विमानतळावरून नागरी विमानसेवा सुरू करण्यासाठी अथक परिश्रम सुरु आहेत. केंद्रीय नागरी उड्डयन मंत्री, महाराष्ट्राचे मुख्यमंत्री आणि संबंधित विभागाला वेळोवेळी विनंतीपर निवेदने व्यक्तीगत भेटुन सोलापूरच्या विमानसेवे संदर्भात देण्यात आलेली आहेत, तरी देखील ह्या सगळ्यांच्या प्रयत्नांना सकारात्मक असे यश आले नसल्याने सोलापूरकरांच्या भावना तीव्र असल्याचे सोलापूर विकास मंचच्या वतीने शासकीय विश्रामगृहात आयोजित बैठकीत सूर व्यक्त करण्यात आला.
दिवाळी पर्यंत होटगीरोड विमानतळावरून नागरी विमानसेवा सुरू न झाल्यास आम्ही सर्व सोलापूरकरांना घेऊन चक्री उपोषण करणार असल्याचे माजी आमदार नरसिंग मेंगजी आणि माजी उपमहापौर राजेश काळे यांनी सोलापूर विकास मंचच्या बैठकीत निर्धार व्यक्त केला आहे. सामान्य सोलापूरकरांच्या शांततेचा अंत जिल्हा प्रशासन पाहत असून त्यांच्या वतीने होणार्या दफ्तर दिरंगाईबद्दल सोलापूरकरांच्या नाराजीचा सूर असून त्याचा परिणाम येणाऱ्या काळात अत्यंत तीव्र स्वरूपांचे उद्रेकात्मक आंदोलन होणार असल्याची कल्पना आजच्या बैठकीत देण्यात आली. सदर बैठकीस सोलापूरातील नामांकित संस्था, संघटना आणि व्यक्ती बहुसंख्येने उपस्थित होते.
जोवर सामान्य जनतेला विमानसेवा नाही तोवर मंत्री आणि व्हि.व्हि.आय.पींना देखील विमानसेवा कायमस्वरूपी बंद करा असा ठराव आजच्या बैठकीत मंजूर करण्यात आला. ह्या वेळी सोलापूर विकास मंचचे सदस्य केतन शहा, मिलिंद भोसले, योगीन गुर्जर, गणेश पेनगोंडा, विजय कुंदन जाधव, आनंद पाटील, अनंत कुलकर्णी, प्रतिक खंडागळे, अॅड. दत्तात्रय अंबुरे, मनोज क्षीरसागर, कैलास लांडगे, सुहास भोसले, जयश्री तासगावकर, गौरी आंमडेकर, अनिता कुलकर्णी, डॉ. सुभाष वैकुंठे, डॉ. दीलीप बुरटे, अरविंद रंगा, बालकृष्ण अवदुत, भक्ती जाधव, भारत कसबे, गणेश शिलेदार, नागनाथ मेंगाणे, इक्बाल हुंडेकरी, रमेश खुने, दत्तात्रय जमादार, नितीन बिज्जरगी, डॉ. अमोल गोडसे, काशीनाथ भतगुणगी, रेवणसिद्ध जवळकोटे, सुर्यकांत पारेकर, नागनाथ मेंगाणे, चंद्रकांत ईश्वरकट्टी, महेश सावंत, अमोल तटकरे, दीपक भंडारे, व्यंकटेश पोत्तदार, बिबिषन कांबळे, महेश घोडके, विलास मोरे आदी मान्यवर उपस्थित होते.
