सोलापूर – १२ फेब्रुवारी २०२६ रोजी रात्री दीड वाजण्याच्या सुमारास सोलापूर पुणे महामार्गावर मोडनिंब गावाजवळ हॉटेल ओंकार पॅलेस जवळ एक भरधाव क्रेटा कार क्रमांक MH 13 EX 1297 सोलापूर वरून पुण्याकडे जात असताना रस्त्याच्या बाजूला असलेल्या लोखंडी संरक्षक कठड्याला धडकून रस्त्याच्या बाजूला असलेल्या खड्ड्यात पलटी होऊन झालेल्या अपघातात कार चालकाच्या डोक्याला जबर मार लागल्याने त्याचा जागीच मृत्यू झाला. या अपघाताची तीव्रता एवढी जास्त होती की कारने तीन चार पण पलटी मारल्याने कारचे सर्व दरवाजे लॉक होऊन सदर कार चालक आतमध्येच अडकुन पडला होता. वरवडे टोल नाका येथील ग्रस्तीपथक आणि रुग्णवाहिका पथकाने टेंभुर्णी पोलिस स्टेशन येथील पथकाच्या मदतीने अथक प्रयत्न करून कारचे दरवाजे तोडून कारचालक कारमधून बाहेर काढून वरवडे टोल नाका येथील रुग्णवाहिकेमधून डॉ.महेंद्र ताकतोडे आणि रुग्णवाहिका चालक नागनाथ भालेराव यांनी टेंभुर्णी येथील शासकीय रुग्णालयात शवविच्छेदनासाठी दाखल केले.
या अपघातामध्ये क्रेटा कारचे मोठ्या प्रमाणात नुकसान झाले असून या अपघाताची माहिती मिळताच वरवडे टोल प्लाजा येथील ग्रस्तीपथक उमेश भोसले, ग्रस्तीपथक वाहन चालक तुळशीराम गायकवाड, सहाय्यक विनोद भोसले आणि मोडनिंब महामार्ग पोलिस मदत केंद्राचे प्रभारी अधिकारी बालाजी साळुंखे (PSI) आणि त्यांचे कर्मचारी तात्काळ घटनास्थळी दाखल झाले. वरवडे टोल नाका येथील ग्रस्तीपथकाने टेंभुर्णी पोलिस स्टेशन येथील कर्मचारी आणि मोडनिंब महामार्ग पोलिस मदत केंद्राच्या पोलिसांच्या मदतीने या अपघातातील क्रेटा कार वरवडे टोल नाका येथील क्रेनच्या मदतीने रस्त्याच्या बाजूला करण्यात आली. या अपघातात मृत्यू झालेल्या कार चालकाचे नाव प्रवीण अण्णासाहेब पाटील वय ४० वर्षे रा. शेळगी सोलापूर सिटी असे आहे. सदर अपघाताची माहिती टेंभुर्णी पोलिस स्टेशन येथील अपघात विभागाचे अधिकारी सरडे यांना दिली असल्याची माहिती वरवडे टोल प्लाझा येथील ग्रस्तीपथकाचे प्रमुख उमेश भोसले यांनी दिली आहे.
