सोलापूर : मुंबई-पुणे एक्स्प्रेसवेवर मुंबईच्या दिशेनं येणारी 6 वाहनं बोरघाटात एकमेकांना धडकली. या अपघातात 4 जणांचा जागीच मृत्यू झाला असून 8 जण जखमी आहेत. मृत्यू झालेले चारही जण सोलापूरचे असून काँग्रेस नेते गौरव खरात, सौरभ तुळसे, सिद्धार्थ राजगुरूसह आणि तुळजापूर येथील कदम नावाचा युवक यांचा जागीच मृत्यू झाला आहे. तर जखमींवर नवी मुंबईतील महात्मा गांधी रुग्णालयात उपचार सुरु आहेत.
एक्सप्रेसवेवरुन जाणाऱ्या एका कंटेनरने पुढे जाणाऱ्या स्विफ्ट कारला धडक दिली. स्विफ्ट कार तिच्यापुढे जाणाऱ्या टेम्पोवर जाऊन आदळली. स्विफ्ट कारनं दिलेल्या धडकेमुळं टेम्पो त्याच्यापुढे जात असलेल्या कारवर जाऊन आदळला. या कारच्यापुढे आणखी एक कंटेनर जात होता, ही कार त्या कंटेनरवर जाऊन आदळली. अशी ६ वाहने एकमेकांना धडकली असून मुंबईच्या दिशेने येणाऱ्या या वाहनांचा बोरघाटात भीषण अपघात झाला.
