सोलापूर – सोलापुरातील हुतात्म्यांनी अपूर्व आहुती देऊन स्वातंत्र्य लढ्याचा जाज्वल्य इतिहास जोपासला आहे. मातृभूमीच्या स्वातंत्र्यास्तव समरांगणी पडलेल्या हुतात्म्यांना हृदयफुले अर्पून डॉ श्रीकांत येळेगावकर यांनी इतिहासातील ‘ ते ‘ प्रसंग पुन्हा जिवंत केले.
रोटरी क्लब ऑफ सोलापूर नॉर्थ आयोजित ” भारतीय स्वातंत्र्यात सोलापूर चे योगदान ” या विषयावर ते बोलत होते. कार्यक्रमाच्या अध्यक्ष स्थानी रोटरी नॉर्थ चे अध्यक्षा डॉ जानवी माखिजा या होत्या. राष्ट्रगीताने कार्यक्रमाची सुरुवात झाली. तशीच स्फूर्तिदायक , प्रेरक माहिती सोलापूरचे योगदान या विषयी डॉ. येळेगावकर यांनी माहिती दिली.
महात्मा गांधी,लोकमान्य टिळक, नेताजी सुभाषचंद्र बोस आदी महान क्रांतिकारकांच्या विचारांनी भारावून सोलापुरातील युवकांनी शौर्य, धैर्य आणि पराक्रमाची बाजी लावली. गुलामी पारतंत्र्य झिडकारून ते स्वातंत्र्याचा सूर्य झेलण्या
फासावर चढले. भारतीय स्वातंत्र्यापूर्वी सोलापूरकरा नी लढून मिळवलेल्या स्वातंत्र्याचा रोमांचक लढा त्यांनी नवीन पिढी समोर उलगडून ठेवला. गांधी टोपी लढ्याचे प्रेरणा स्थान होते. ब्रिटिश सैनिकांनी देशभक्त तुळशीदास जाधव यांच्या डोक्यावरील टोपी पायदळी तुडवली. या आंदोलनात सोलापूरच्या चार हुतात्म्यांना फासावर लटकवले गेले. त्यांनी सांगितलेला सोलापूरच्या क्रांतीचा इतिहास आजही रोमांच उभा करणारा होता.
प्रारंभी सर्व उपस्थितांचे स्वागत रोटरी नॉर्थ चे अध्यक्षा डॉ जानवी माखिजा यांनी केले. प्रमुख पाहुण्यांची ओळख मधुरा वडापुरकर यांनी करून दिली. अध्यक्षा डॉ माखीजा यांनी प्रमुख पाहुण्यांचा शाल व पुष्पगुच्छ देऊन सत्कार केला. तर आभार सुनील दावडा यांनी मानले.
या कार्यक्रमास स्वप्नील कोंडगुळे, सुनील दावडा , बळीराम पावडे, संपत बलदवा, संतोष भंडारी, दीपक आर्वे, दिलीप गायकवाड, संजय चौगुले, आसावरी सराफ, क्षितिजा गाताडे, अमोल व्यवहारे, डॉक्टर बाळासाहेब शितोळे, शितोळे ,श्री अग्रवाल, दीपक आहुजा, आदी उपस्थित होते.
