सोलापूर प्रतिनिधी दि 6 फेब्रुवारी मोहोळ मतदार संघात राज्यातील पहिलाच यशस्वी प्रयोग राबवत ८५ अ जमीन वाटप विभाजन प्रक्रियेमध्ये वारंवार येणाऱ्या अडचणी पाहता नागरिकांच्या सोयीसाठी आमदार यशवंत माने यांनी स्वतः सर्व कागदपत्रे जमा करून २२७ प्रकरणे दाखल करून नागरिकांचे हेलपाटे वाचवण्याच्या दृष्टीने एकत्रित आयोजित केलेले शिबिर कौतुकास्पद असून त्यांनी तालुक्यात सुरू केलेला विकास कामांचा सपाटा निश्चितच मोहोळ तालुक्यासाठी समृद्धशाली बनवणारा असल्याचे प्रतिपादन माजी आमदार राजन पाटील यांनी केले.
मोहोळचे आमदार यशवंत माने यांच्या संकल्पनेतून मोहोळ तालुक्यातील शेतकरी बांधवांचे गट फोडणी म्हणजे विभाजन ८५ अ कलमाद्वारे दाखल करून सदर प्रकरणांचे आदेश देण्याकामी आयोजित करण्यात आलेल्या शिबिरात ते बोलत होते. यावेळी व्यासपीठावर आ यशवंत माने, सोलापूरचे अप्पर जिल्हाधिकारी संजीव जाधव, राष्ट्रवादीचे ज्येष्ठ नेते बळीराम साठे, तहसीलदार जीवन बनसोडे, सभापती रत्नमाला पोतदार आदी उपस्थित होते.
पुढे बोलताना राजन पाटील म्हणाले की सर्वसामान्य जनतेच्या मनातील प्रश्न आणि अडचणी ओळखून त्या शासन दरबारी मांडून न्याय देण्याची भूमिका ही लोकप्रतिनिधीची असते आमदार यशवंत माने यांनी शेतकऱ्यांचा अत्यंत जिव्हाळ्याचा असा प्रश्न सोडवण्याचा केलेला प्रयत्न उल्लेखनीय आहे असा कार्यतत्पर आमदार निवडून दिल्याचे समाधान आम्हाला व राष्ट्रवादी काँग्रेसच्या कार्यकर्त्यांना आहे.
यावेळी अप्पर जिल्हाधिकारी संजीव जाधव यांनीही मनोगत व्यक्त केले. तहसीलदार जीवन बनसोडे यांनी प्रास्ताविक केले. या शिबिरामध्ये राष्ट्रवादी काँग्रेसचे बहुसंख्य पदाधिकारी, महिला व शेतकरी उपस्थित होते.
