सोलापूर : राज्यात अनेक जिल्ह्यांत कोरोनाची परिस्थिती आटोक्यात येत आहे. परंतु सोलापूर जिल्ह्यातील ग्रामीण भागात कोरोना रुग्णांची संख्या कमी होताना दिसत नाही. या पार्श्वभूमीवर मुख्य कार्यकारी अधिकारी यांनी सर्व संपर्क अधिकारी यांना त्यांना नेमून दिलेल्या भागात भेटी देण्याचे आदेश दिले होते. सर्व संपर्क अधिकारी यांनी आपापल्या तालूक्यात भेटी देऊन कोरोना प्रतिबंधात्मक उपाययोजनांचा आढावा घेतला.
या भेटीदरम्यान काही अधिकारी व कर्मचारी आपल्या कर्तव्यावर गैरहजर आढळले होते. या सर्व गैरहजर अधिकारी व कर्मचाऱ्यांना सीईओ स्वामी यांनी कारणे दाखवा नोटिसा बजावल्या आहेत. दक्षिण सोलापूर पंचायत समितीच्या सहाय्यक गटविकास अधिकारी रंजना कांबळे यांनी प्राथमिक आरोग्य केंद्र औराद येथे भेट दिली असता डॉ.निलम घोगरे वैद्यकीय अधिकारी प्राथमिक आरोग्य केंद्र औराद, पी.बी. सोलंकी औषध निर्माण अधिकारी, एम.बी. देशमुख आरोग्य सहाय्यक हे अधिकारी व कर्मचारी गैरहजर आढळले. तसेच शिक्षणाधिकारी संजय राठोड यांनी मंगळवेढा तालुक्यातील बोराळे प्राथमिक आरोग्य केंद्रास भेट दिली असता जयत्री बेताळे आरोग्य सहाय्यीका गैरहजर आढळल्या या सर्व गैरहजर अधिकारी व कर्मचाऱ्यांना सीईओ स्वामी यांनी कारणे दाखवा नोटिसा बजावल्या आहेत.
