अधिकाऱ्यांकडून निवडणूक खर्च देण्यास टाळाटाळ, नगरसेवक आक्रमक, ठेकेदार वैतागले

सोलापूर महापालिकेची निवडणूक होऊन आठ ते नऊ महिन्याचा कालावधी लोटला. तरीही महापालिकेतील अधिकाऱ्यांना या निवडणुकीत नेमका किती खर्च झाला हे सांगता येईना. उपमहापौर ज्ञानेश्वरी देवकर, संकेत किल्लेदार, अर्चना वडनाल यासह सहा नगरसेविकांनी निवडणूक खर्चाबाबत हिशोब द्यावा अशी मागणी पत्राद्वारे आयुक्तांकडे केली आहे. आजवर दोन वेळा अतिरिक्त आयुक्त संदीप कारंजे यांच्याकडे या नगरसेवकांची बैठक झाली. कालच्या बैठकीमध्ये देखील विविध माहिती नगरसेवकांनी विचारली मात्र त्याची थातूरमातूर उत्तरे देण्यात आली. संदीप कारंजे, रत्नदीप जवळगेकर, सारिका अकुलवार यांना बैठकीत आम्ही विविध प्रश्न आणि कागदपत्रे विचारली मात्र प्रत्येकाने चुकीची उत्तरे दिली आणि पुढच्या बैठकीत माहिती देऊ असे सांगितले. निवडणूक खर्चात अनेक अधिकाऱ्यांनी टक्केवारी घेतल्याचा आरोप ठेकेदार करू लागले आहेत त्याच अधिकाऱ्यांनी आता हात वर केले आहेत. शिवाय सहा कोटी 90 लाखांचं बिल तीन कोटी सत्तर लाख रुपये करून त्याची मंजुरी घेण्याचा प्रस्ताव स्थायी समिती समोर पाठवला आहे. स्थायी समितीने देखील याला मंजुरी दिली नाही त्यामुळे निवडणूक खर्चाचा कोट्यावधीचा हिशोबवादाच्या भौऱ्यात सापडला आहे.