एमआयडीसी पोलिसांचा दणका; आयशर ट्रकसह २१.१९ लाखांचा मुद्देमाल जप्त
सोलापूर : ट्रान्सपोर्ट व्यावसायिकाचा विश्वास संपादन करून ५ लाख ५४ हजार २५८ रुपयांचा पीव्हीसी पॅनलचा माल लंपास करणाऱ्या सराईत ठकबाजाला एमआयडीसी पोलिसांनी जेरबंद केले. आरोपीकडून फसवणुकीचा माल, गुन्ह्यात वापरलेला आयशर ट्रक आणि दोन मोबाईल असा तब्बल २१ लाख १९ हजार २५८ रुपयांचा मुद्देमाल जप्त करण्यात आला आहे.
परवेज फैज अहमद मोहोळकर यांच्या न्यू इंडिया ट्रान्सपोर्टमधून ३१ जुलै रोजी आयशर ट्रक चालकाने मालवाहतुकीचे भाडे मिळवून देण्याच्या बहाण्याने विश्वास संपादन केला. उमर ट्रेडर्स येथून ५.५४ लाखांचा पीव्हीसी पॅनलचा माल विजयपूरला पोहोचविण्यासाठी घेतला; मात्र माल विजयपूरला पोहोचलाच नाही. चालकाने मालाची परस्पर विल्हेवाट लावत ट्रान्सपोर्ट व्यावसायिकासह मालमालकाची फसवणूक केली.
याप्रकरणी एमआयडीसी पोलीस ठाण्यात गुन्हा दाखल होताच पोलिसांनी सीसीटीव्ही फुटेज आणि गोपनीय माहितीच्या आधारे आरोपीचा शोध सुरू केला. अखेर २१ ऑगस्ट रोजी अक्कलकोट रोडवरील बीएसएनएल टॉवर परिसरात आयशर ट्रकसह संशयित थांबलेला असल्याची माहिती मिळाली.गुन्हे प्रकटीकरण पथकाने तत्काळ कारवाई करून प्रतिक दत्तात्रय निंबाळकर (वय २६, रा. गोपाळवाडी, दौंड) याला ताब्यात घेतले. पोलिसी खाक्या दाखवताच त्याने साथीदार पंकज पारधे याच्यासोबत मिळून माल हडपल्याची कबुली दिल्याचे पोलिसांनी सांगितले.
तपासात आरोपीकडून ५.५४ लाखांचा पीव्हीसी पॅनलचा माल, १५ लाखांचा आयशर ट्रक आणि ६५ हजारांचे दोन मोबाईल जप्त करण्यात आले. या प्रकरणात आणखी कोणाचा सहभाग आहे का, याचा तपास सुरू आहे.
ही कारवाई पोलीस आयुक्त एम. राजकुमार, पोलीस उपायुक्त प्रितम यावलकर, सहायक पोलीस आयुक्त अरुण देवकर यांच्या मार्गदर्शनाखाली वरिष्ठ पोलीस निरीक्षक भाऊराव बिराजदार, पोलीस निरीक्षक संगीता पाटील आणि पोलीस उपनिरीक्षक अल्फाज शेख यांच्या पथकाने केली.
