महात्मा जोतिराव फुले यांच्या जन्म द्विशताब्दी वर्षानिमित्त सोलापुरात ‘फुले विचार प्रबोधन पर्व’ या विशेष उपक्रमाचा शुभारंभ येत्या मंगळवार, ७ जुलै २०२६ रोजी सायंकाळी ६ वाजता होणार आहे.
डॉ. निर्मलकुमार फडकुले सभागृहात होणाऱ्या या कार्यक्रमात मुंबई विद्यापीठाच्या राज्यशास्त्र विभागाचे प्राध्यापक आणि मराठी अभ्यास केंद्राचे अध्यक्ष प्रा. डॉ. दीपक पवार यांचे “महात्मा जोतिराव फुले आणि सत्यशोधक चळवळ” या विषयावर विशेष व्याख्यान होणार आहे.
महात्मा जोतिराव फुले जन्म द्विशताब्दी समितीच्या वतीने आयोजित या प्रबोधन पर्वामध्ये वर्षभर विविध सामाजिक, शैक्षणिक आणि वैचारिक उपक्रम राबविण्यात येणार आहेत. यामध्ये फुले साहित्य आणि कार्यावरील व्याख्याने, वक्तृत्व, निबंध, प्रश्नमंजुषा अशा विविध स्पर्धांचे आयोजन करण्यात येणार असून, वर्षअखेरीस महात्मा फुले विचार संमेलनही आयोजित करण्याचा समितीचा संकल्प आहे.
सामाजिक समता, शिक्षण आणि परिवर्तनवादी विचारांचा प्रसार करण्याच्या उद्देशाने आयोजित या कार्यक्रमाला सामाजिक, शैक्षणिक, साहित्यिक आणि पुरोगामी क्षेत्रातील मान्यवरांसह नागरिकांनी मोठ्या संख्येने उपस्थित राहावे, असे आवाहन आयोजकांनी केले आहे.
