सोलापूर :- भारत निवडणूक आयोगाने दिनांक 18 मे 2026 अन्वये महाराष्ट्र विधान परिषदेच्या स्थानिक प्राधिकारी मतदार संघाची द्विवार्षिक निवडणूक 2026 करीता कार्यक्रम जाहीर केला आहे. सोलापूर स्थानिक प्राधिकारी मतदार संघाच्या निवडणुकीसाठी जिल्हा परिषद सोलापूर, सोलापूर महानगरपालिका तसेच 17 नगरपरिषद व नगरपंचायती अशा एकूण 19 स्थानिक प्राधिकारी संस्था असून त्यांची एकूण मतदार संख्या 616 आहे, अशी माहिती जिल्हा निवडणूक अधिकारी तथा जिल्हाधिकारी एस. कार्तिकेयन यांनी दिली आहे.
या 616 मतदारांची प्रारूप यादी प्रसिद्ध करण्यात आलेली असून ती जिल्हाधिकारी कार्यालय, जिल्हा परिषद, महानगरपालिका, सर्व उपविभागीय अधिकारी, तहसीलदार, पंचायत समिती तसेच सर्व नगरपरिषद व नगरपंचायत कार्यालयात कार्यालयीन वेळेत तपासणीसाठी उपलब्ध आहे.
मतदार यादीतील नावाबाबत किंवा समावेशाबाबत कोणताही आक्षेप असल्यास तो दिनांक 27 मे 2026 पूर्वी फॉर्म क्रमांक 17, 7 किंवा 8 मध्ये नोंदवून जिल्हाधिकारी कार्यालय, सहायक मतदार नोंदणी अधिकारी (निवासी उपजिल्हाधिकारी, सोलापूर) यांच्या कार्यालयात सादर करावा किंवा टपालाने पाठवावा. निवडणुकीच्या अनुषंगाने जिल्हाधिकारी कार्यालयात नियंत्रण कक्ष स्थापन करण्यात आलेला असून त्याचा दूरध्वनी क्रमांक 0217-2731012 असा आहे, असे जिल्हाधिकारी कार्तिकेयन यांनी सांगितले.
