सोलापुरातील वाचन चळवळ वाढावी हीच अपेक्षा : डॉ. सुहासिनी शहा
सोलापूर – पुस्तके वाचक लोकांचा समूह बनवून सोलापुरातील वाचन चळवळ वाढावी या अपेक्षेने या प्रिसिजन वाचन अभियान कार्यक्रमाची सुरुवात केली आहे, असे मत प्रिसिजन फाउंडेशनच्या प्रमुख डॉ. सुहासिनी शहा यांनी व्यक्त केले.
प्रिसिजन फाउंडेशन व आयएमए सोलापूर यांच्या संयुक्त माध्यमातून आयोजित प्रिसिजन वाचन अभियानात त्या बोलत होत्या. यावेळी व्यासपीठावर ‘वॉकिंग ऑन द एज’ पुस्तकाचे लेखक प्रसाद निक्ते, आयएमए च्या डॉ.किरण सारडा ,आनंद अवधानी आदी मान्यवर उपस्थित होते.
प्रारंभी डॉ. सुमेधा कंदलगावकर यांनी वॉकिंग ऑन द एज पुस्तकाचे अभिवाचन प्रेक्षकांसमोर सादर केले त्यानंतर दीपप्रज्वलनाने या कार्यक्रमाचे औपचारिक उद्घाटन करण्यात आले. उद्घाटन प्रसंगी डॉ.सुहासिनी शहा बोलताना म्हणाल्या कि, प्रिसिजन गप्पांच्या समूहाप्रमाणेच प्रिसिजन वाचन समूह वाढवण्यासाठी दर महिन्याच्या पहिल्या शनिवारी आयएमए हॉलमध्ये हा कार्यक्रम आयोजित करणार असल्याचे सांगितले.
आयएमएच्या डॉ. किरण सारडा यांनी प्रत्येकाच्या आयुष्यावर मित्र आणि पुस्तकांचा मोठा प्रभाव असतो म्हणूनच पुस्तकांनाच मित्र बनवावे व वाचनाच्या माध्यमातून मनाचा व्यायाम करावा या मनातील सुप्त इच्छेला मूर्त स्वरूप मिळाल्याचा आनंद झाल्याचे सांगितले.
यावेळी वॉकिंग ऑन द एज पुस्तकाचे प्रकाशन केल्यानंतर आनंद अवधानी यांनी आपल्या मनोगतात कुठलीही गोष्ट दोन बाबींवर अवलंबून असते एक म्हणजे इमॅजिनेशन व दुसरी इम्प्लिमेंटेशन या दोन्ही गोष्टी वाचन अभियानासही लागू आहेत असे सांगतानाच प्रिसिजन व आयएमएच्या या उपक्रमाचे कौतुक केले. प्रत्येक शहराच्या आर्थिक प्रगती बरोबरच सांस्कृतिक वैभव आता देखील वाढ झाली नाही तर शहराचे अधोगतीकडे वाटचाल होत असल्याचे देखील त्यांनी यावेळी सांगितले शहराचे सौंदर्य हे वाचन संस्कृती वाढविण्यावरच अवलंबून आहे त्यासाठी प्रिसिजन व आयएमएने घेतलेला पुढाकार हा प्रत्येकाने स्वतः घेतलेला पुढाकार आहे समजून काम केल्यास सोलापूरला नवीन ओळख जागतिक स्तरावर मिळेल असे मत यावेळी त्यांनी व्यक्त केले.
यानंतर वॉकिंग ऑन द एज पुस्तकाचे लेखक प्रसाद निक्ते यांनी सातपुडा पर्वत ते सह्याद्री पर्वत रांगांच्या ७५ दिवसातील हजार किलोमीटर पेक्षा जास्त प्रवासाच्या आठवणींना मुलाखतीच्या माध्यमातून उजाळा देत काही विशेष घडामोडी व घटनांवर प्रकाश टाकत प्रेक्षकांना प्रवासाबद्दल माहिती दिली. ७५ दिवसांच्या प्रवासात वेगवेगळ्या लोकांनी केलेली मदत व प्रवासात आलेले अनुभव यावेळी त्यांनी उपस्थितांना सांगितले. प्रेक्षकांनी विचारलेल्या प्रश्नांना देखील निकते यांनी उत्तरे देत कार्यक्रमात रंगत आणली.
या कार्यक्रमाचे सूत्रसंचालन व निकते यांची मुलाखत माधव देशपांडे यांनी तर आभार प्रदर्शन श्रीधर खेडगीकर यांनी केले.
