सोलापूर : शहरातील वसंत विहार येथील महिलेच्या गळ्यातील चेन स्नॅचिंग करून बाळे येथील दुकानात एकटीच असलेल्या महिलेचे गंठण कोयत्याचा धाक दाखवून चोरणाऱ्या पाचपैकी तिघांना फौजदार चावडी पोलिसांनी काही तासांतच अटक केले. सिनेस्टाईलने बाळ्यातील माळरानावर दोन- अडीच तासांचा पाठलाग करून त्यांना पोलिसांनी पकडले.
नगरवरून दुचाकी चोरून पंजाबमधील पाचजण सोलापुरात आले होते. त्यातील तिघांकडे एक चारचाकी देखील होती. दुचाकीवरील दोघेजण डाव कोठे टाकता येईल याची माहिती घेऊन चोरी तथा चेन स्नॅचिंग करायचे. दुपारी सव्वाबाराच्या सुमारास वसंत विहारमधील महिलेच्या गळ्यातील दागिने दुचाकीवरील (एमएच १६, डीजे ७७२४) दोघांनी ओढून नेले.
त्यानंतर एका तासाच अंबिकानगर, बाळे येथील महिलेच्या गळ्यातील दागिने कोयत्याचा धाक दाखवून चोरले आणि चारचाकीतून (पीबी १०, जेके १९९३) तिघे व दुचाकीवरून दोघे पसार झाल्याची खबर फौजदार चावडी पोलिसांना मिळाली. महिलेने आरडाओरडा केल्याने ही बाब पोलिसांपर्यंत पोचली. बाळे परिसरात वाहतूक जाम असल्याने चोरट्यांनी बार्शी रोडने वेगाने वाहन पळवून माळरानावर गाडी नेली.
