सोलापूर, दि.११- ग्रामदेवत शिवयोगी सिध्दरामेश्वरांच्या धार्मिक विधीसाठी लागणान्या मातीच्या ५६ घागरीची मोठ्या उत्साही व आनंदी वातावरणात मिरवणूक काढून मानकरी कुंभार घराण्याने या घागरी यात्रेतील मानकरी हिरेहब्बूंकडे सुपुर्द केल्या.
गुरूवारी, सकाळी साडेआठ उत्तर कसब्यातील कुंभार वाड्यात योगीराज कुंभार यांच्या निवासस्थानी दिवे बसविण्याचा कार्यक्रम झाला. त्यानंतर श्री गणराय आणि श्री सिध्दरामेश्वरांच्या प्रतिमेचे भक्तिभावनेने पूजन करण्यात आले. यात्रेतील धार्मिक विधीसाठी लागणाऱ्या मातीच्या ५६ घागरीची पूजाही करण्यात आली. त्यानंतर तेथून सवाद्य मिरवणुकीला सुरुवात झाली.
यावेळी प्रमुख मानकरी मल्लिकार्जुन कुंभार, महादेव कुंभार, रेवणसिध्द कुंभार, अशोक कुंभार, सुरेश कुंभार यांच्यासह भीमाशंकर मेहत्रे व तसेच समाजातील मान्यवर उपस्थित होते.
४ दिवसाच्या यात्रेत 68 लिंगाला तैलाभिषेक करण्यासाठी आमच्याकडून 56 मातीच्या घागरी देण्याची प्रथा आहे. ही परंपरा गेल्या 900 वर्षापासून अखंडपणे सुरू आहे.
