एका छत्रीत ६ जण, मुसळधार पावसात हार मानली नाही

आयपीएल २०२३चा विजेता कोण होणार याचा निर्णय २८ मे ला होणार होता. पण पावसाने जोरदार बॅटिंग केली आणि फायनल मॅच पुढे ढकलण्यात आली. अहमदाबाद येथील नरेंद्र मोदी स्टेडियमवर चेन्नई सुपर किंग्ज आणि गुजरात टायटन्स यांच्यात लढत होणार होती. सर्व तयारी झाली होती, मात्र टॉसच्या काही मिनिटे आधी पावसाला सुरुवात झाली जो थांबलाच नाही, ज्यामुळे अंतिम लढत आज २९ मे रोजी होणार आहे. अंतिम सामन्यात आलेल्या या पावसामुळे चाहत्यांना निराश केले. एका बाजूला स्टेडियमवर आणि टीव्हीवर चाहते कधी एकदा पाऊस थांबतोय आणि मॅचला सुरुवात होईल याची वाट पाहत होते. तर दुसऱ्या बाजूला पाऊस पडत असताना देखील मॅच खेळवता यावी यासाठी मैदानावरील स्टाफ जीवाचे रान करत होता. मैदानाला जेव्हा तळ्याचे स्वरुप आले होते तेव्हा देखील हे कर्मचारी पाणी काढण्याचे काम करत होते. अशातच एक फोटो समोर आला आहे ज्यात एका छतरीमध्ये सहा ग्राउंड स्टाफ पावसापासून स्वत:चा बचाव करत आहेत. पाऊस कितीही पडो पण आम्ही मॅच सुरु होण्यासाठी प्रयत्नांची शर्थ करू हेच या फोटोतून दिसून येते.