धर्मराज काडादींनी दिले संकेत
सोलापूर : श्री सिद्धेश्वर देवस्थान संस्थेच्या विरोधात भूमिका घेऊन नाहक बदनामी करणाऱ्याचे कारस्थान रचले जात आहे. अशा विरोधात आता देवस्थान समितीचे अध्यक्ष धर्मराज काडादी यांनी रणसिंग फुंकले आहे. विनाकारण विरोधात भूमिका घेणाऱ्या मंडळीं विरोधात सर्व निवडणुकीत श्री सिद्धेश्वर परिवाराचा उमेदवार रण मैदानात उभारणार असल्याचे श्री सिद्धेश्वर देवस्थान कमिटीचे अध्यक्ष धर्मराज काडादी यांनी पत्रकार परिषदेत जाहीर केले आहे.
श्री सिद्धेश्वर देवस्थान या संस्थेच्या विरोधात विनाकारण संभ्रमाचे वातावरण पसरवले जात आहेत. यात्रा असो अथवा देवस्थान या ना त्या कारणाने आरोप केले जात आहेत. श्री सिद्धेश्वर देवस्थान व यात्राही सोलापूरकरांचे श्रद्धास्थान आहे. याचे भान ठेवले जात नाही. यातून केवळ देवस्थानच नव्हे तर सोलापूरचीही बदनामी होते. हे लक्षात न घेता काहीजण खोटे-नाटे आरोप करून दिशाभूल व धूळफेक करण्याचा प्रयत्न करीत आहेत. त्यामुळे देवस्थान विरोधात विनाकारण विरोधी भूमिका घेणाऱ्या विरोधात आता नगरसेवक आमदार व खासदारकीच्या निवडणुकीत सिद्धेश्वर परिवाराचा उमेदवार निवडणुकीच्या मैदानात उभा राहील असे अध्यक्ष धर्मराज काडादी यांनी यावेळी स्पष्ट केले.
“पाटील” यांच्याविरोधात राहणार “माळगे”
दरम्यान, येणाऱ्या महापालिका निवडणुकीत “पाटील” यांच्या विरोधात देवस्थान कमिटीतील “माळगे” हे उमेदवार राहतील असेही अध्यक्ष धर्मराज काडादी यांनी जाहीर केले. यामुळे येणारी महापालिका निवडणूक “सिद्धेश्वर परिवार” रण मैदानात उतरल्याने रंगतदार ठरणार असल्याचे दिसून येते.
