सोलापूर- पुण्यश्लोक अहिल्यादेवी होळकर सोलापूर विद्यापीठ आणि डॉ. अनंत अँड लता लाभसेटवार चॅरिटेबल ट्रस्ट नागपूर यांच्या संयुक्त विद्यमाने सोमवार, दि. 23 जानेवारी 2023 रोजी सायंकाळी चार वाजता विद्यापीठाच्या मुख्य सभागृहात उस्मानाबाद येथील जेष्ठ पत्रकार रवींद्र केसकर यांचे व्याख्यान आयोजित करण्यात आल्याची माहिती कुलसचिव योगिनी घारे यांनी दिली.
‘डॉ. अनंत अँड लता लाभसेटवार व्याख्यानमाला 2023-24’ अंतर्गत या व्याख्यानमालेचे आयोजन करण्यात आले आहे. ज्येष्ठ पत्रकार केसकर यावेळी ‘सामाजिक समता आणि प्रसार माध्यमांची भूमिका’ या विषयावर चौदावे पुष्प गुंफणार आहेत. कुलगुरू डॉ. मृणालिनी फडणवीस यांच्या अध्यक्षतेखाली हा कार्यक्रम होणार असून विद्यापीठाचे प्र-कुलगुरू डॉ. राजेश गादेवार यांची यावेळी विशेष उपस्थिती राहणार आहे. या व्याख्यानाचा विद्यार्थी, शिक्षक, अधिकारी आणि नागरिकांनी लाभ घ्यावा, असे आवाहन विद्यापीठ प्रशासनाकडून करण्यात आले आहे.
