येस न्युज मराठी नेटवर्क : श्रीक्षेत्र देहू येथील जुगार अड्ड्यावर पोलिसांनी छापा टाकला होता. त्यात देहू संस्थानचे विश्वस्त विशाल महाराज मोरे यांना पकडण्यात आले होते. त्यानंतर देहू संस्थानाने त्यांच्याकडे रितसर खुलासा मागितला होता. मात्र त्यांनी खुलासा न दिल्याने देहू संस्थानाकडून त्यांची हकालपट्टी करण्यात आली. आता त्या एका विश्वस्ताच्या जागेसाठी संस्थानाकडून निवडणूक लावण्यात आली असून लवकरच नवीन निवड केली जाणार आहे.
देहू येथील संत तुकाराम महाराज देवस्थान संस्थानच्या आजी, माजी विश्वस्तांचा या जुगाऱ्यांमध्ये समावेश असल्याने मोठी खळबळ उडाली होती. जुगार अड्ड्यावर पोलिसांची कारवाई झाली त्यातून देहू संस्थानाची बदनामी झाली. त्यानंतर मोरे यांच्याकडे खुलासा मागवण्यात आला होता. मात्र तो न मिळाल्याने संस्थानचे विश्वस्त विशाल केशव मोरे याची पदावरुन हकालपट्टी करण्यात आली आहे.
नेमकं काय झालं होतं?
पुण्यातील चाकण एमआयडीसी हद्दीत जुगार अड्डा सुरु असल्याची माहिती दरोडा विरोधी पथकाला मिळाली होती. देहूगाव ते येलवाडी मार्गावर बंद अवस्थेत कंपनी आहे. त्या कंपनीच्या पहिल्या मजल्यावर तीन ऑगस्टला तीन पत्तीचा खेळ रंगला होता. पिंपरी चिंचवड पोलिसांनी याची खातरजमा करुन सापळा रचला.
जुगाराचा डाव रंगला असताना पोलिसांनी छापा टाकला आणि सर्वांनाच धक्का बसला. पोलिसांनी सर्वांची माहिती घ्यायला सुरुवात केली. तेव्हा पोलिसही चक्रावून गेले. कारण रंगेहाथ सापडलेल्या २६ जणांमध्ये देहूच्या संत तुकाराम महाराज संस्थानचे विश्वस्त विशाल केशव मोरे, माजी विश्वस्त संतोष गुलाब मोरे ही जुगार खेळताना दिसले होते.
विशाल महाराज मोरे यांच्याकडून खुलासा न आल्याने संस्थानाने त्यांची हकालपट्टी केली. त्यानंतर रीतसर निवडणूक प्रक्रिया राबवली जात आहे. एका जागेसाठी ही निवडणूक प्रक्रिया पार पडली जात आहे. अशी माहिती देहू संस्थानचे अध्यक्ष नितीन महाराज मोरे यांनी दिली आहे.
