सोलापूर : पुण्याचे शास्त्रीय गायक मंदार गाडगीळ, मुंबईचे बासरीवादक ऋषिकेश मुजुमदार, बेळगावचे संवादिनी वादक सारंग कुलकर्णी आणि भरतनाट्यम नृत्यांगना रचना कर्णिक यांना पंडित चिदानंद जाधव स्मृती युवा गंधर्व पुरस्कार प्रदान करण्यात आला. अकरा हजार रुपये, सन्मानपत्र असे या पुरस्काराचे स्वरूप होते. यावेळी पोलीस आयुक्त हरीश बैजल यांच्या हस्ते हे पुरस्कार वितरण करण्यात आले. यावेळी संयोजक भीमण्णा जाधव, डॉ. श्रीकांत येळेगावकर, छाया बैजल, युवा कलावंत ऋषिकेश नागावकर, पत्रकार शिवाजी सुरवसे हे उपस्थित होते.
प्रतिभा संगीत महोत्सवाचा उदघाटन प्रसंगी बोलताना पोलीस आयुक्त हरीश बैजल म्हणाले, गेले अनेक महिने कानामध्ये ॲम्बुलन्सचा आवाज घुमत आहे. आता सप्तसुरांच्या आवाजाने मनाला दिलासा आणि आनंद मिळणार आहे. भीमण्णा जाधव यांचे कुटुंब हे स्व:खर्चाने भारतातल्या संगीतक्षेत्रातील दिव्य लोकांचा सन्मान करून त्यांना युवा गंधर्व पुरस्कार देऊन सन्मान करत आहे, ही बाब कौतुकाची आहे.
यावेळी मास्टर व्यंकटेश जाधव आणि कलाश्री जाधव या बालकालावंतांनी त्रितालात छोटा ख्याल राग दुर्गा सादर केला. तबल्यावर संतोष कोथळीकर यांनी साथ केली. सूत्रसंचालन साकवचे जगदीश पाटील यांनी केले.
मंदार गाडगीळ यांनी राग ‘मारो बिहाग’ सादर केला. ऋषीकेश मुजुमदार यांनी ‘सरस्वती’ राग सादर करत बासरीची अनोखी मैफिल सादर केली. बेळगावचे सारंग कुलकर्णी यांनी ‘देस’ राग सादर करत मंत्रमुग्ध केले. रचना कर्णिक यांनी अतुलनीय भरतनाट्यम नृत्यकला सादर केली.
