टोकयो : महिला बॉक्सिंगमध्ये 75 किलो वजनी गटात भारताची पूजा राणीचे आव्हान संपुष्टात आले आहे. पूजाचा टोकयो ऑलिम्पिकमधील क्वार्टर फायनलमध्ये पराभव झाला. पूजा ऑलिम्पिक मेडलपासून फक्त एक विजय दूर होती. या पराभवामुळे तिचे ऑलिम्पिक मेडल हुकले आहे. पूजाची लढत चीनच्या ली क्यूशी होती. ली क्यूने रियोमध्ये 2016 साली झालेल्या ऑलिम्पिकमध्ये ब्रॉन्झ मेडल पटकावले होते. ली क्यूने पहिल्या राऊंडमध्ये आक्रमक सुरुवात केली.
त्यामुळे पूजाला बचावात्मक खेळावे लागले . ली क्यूने पूजाचा पहिल्या राऊंडमध्ये पराभव केला. पूजाने दुसऱ्या राऊंडमध्ये जोरदार प्रयत्न केला, पण लीन क्यूच्या अनुभवापुढे तिचा निभाव लागला नाही. लीन क्यूने तिसऱ्या राऊंडमध्येही सरस खेळ करत सेमी फायनलमध्ये प्रवेश केला.दोन वेळा आशियाई चॅम्पियन असलेल्या पूजानं यापूर्वी अल्जेरियाचा इचरॅक चॅबचा 5-0 असा सरळ पराभव केला होता. पूजाने या मॅचमध्ये जोरदार खेळ करत इचरॅकला कोणतीही संधी दिली नाही, तिनं सुरुवातीपासूनच आघाडी घेत विजय मिळवला होता.वैयक्तिक आयुष्यातल्या अडचणी, शारीरिक समस्यांमधून वाट काढत पूजा राणीने हे यश संपादन केले आहे. एक वेळ अशी होती, की तिचा हात भाजला होता, बॉक्सिंग खेळण्यासाठी कुटुंबातून विरोध होता. तसंच आर्थिक चणचणदेखील होती; मात्र या सर्व अडचणींवर पूजा राणीने मात केली असून, ती अनेक खेळाडूंसाठी प्रेरणा ठरली आहे.
