येस न्युज मराठी नेटवर्क : माजी उपराष्ट्रपती हमीद अन्सारी यांनी बुधवारी आपली खंत व्यक्त केली. देशात काही लोकांकडून मुस्लिमांना ‘परकं’ करण्याचा संघटीत प्रयत्न सुरू आहे. परंतु, भारताचा बहुलतावादी समाज शतकानुशतकांचं वास्तव आहे, असे हमीद अन्सारी यांनी म्हटले आहे. .’बाय मेनी अ हॅपी अॅक्सीडन्ट : रिकलेक्शन ऑफ लाईफ’ या आपल्या पुस्तकाच्या परिचर्चेत बोलताना माजी उपराष्ट्रपतींनी हे मत व्यक्त केले .
‘मुस्लिमांना परके ठरवण्यासाठी काही खास वर्गाकडून संघटीत प्रयत्न केला जात आहे. मी या देशाचा नागरिक आहे की नाही? जर मी या देशाचा नागरिक असेल तर मलाही त्या सर्व गोष्टींचा लाभार्थी होण्याचा हक्क आहे, ज्या एखाद्याला नागरिकत्वामुळे मिळतात’, असे म्हणत हमीद अन्सारी यांनी आपली नाराजीही व्यक्त केली. आपले म्हणणें स्पष्ट न करताच ‘भारतात बहुलतावादी समाज गेल्या वर्षांनुवर्ष अस्तित्वात आहे’ असे अन्सारी यांनी म्हटले आहे. या दरम्यान माजी केंद्रीय मंत्री पी चिदंबरम यांनीही आपलं मत व्यक्त केलं. ‘मी आणि अन्सारी दु:खी आहोत, कारण गेल्या काही वर्षांतील घटनाक्रमांमुळे मुस्लीम वर्गाला धोका निर्माण होत असल्या दिसून येत आहे . या वर्गाला आपल्याला असलेल्या धोक्याची जाणीव आहे, त्यामुळे ते मागे सरत आहेत, असंही चिदंबरम यांनी म्हटले आहे. ‘भारतात मुस्लीम ओळख असलेल्या व्यक्तींना जाणून-बुजून टार्गेट करण्यात येत आहे आणि शासन त्यांना धूर्तपणे निशाण्यावर घेत आहे’, असे म्हणत पी चिदंबरम यांनी थेट केंद्रातील मोदी सरकारवर निशाणा साधला.
