कोण होणार झेडपीचा अध्यक्ष?, पालकमंत्र्यांची इकडे ताकद,तिकडे पराभव..!

पालकमंत्री जयकुमार गोरे यांनी सोलापूर महापालिकेप्रमाणेच सोलापूर जिल्हा परिषद निवडणुकीत विरोधकांचा सुपडा साप केला. सोलापूर जिल्ह्यात पालकमंत्री जयकुमार गोरे यांची गाडी सुसाट वेगाने धावली मात्र त्यांचे होम ग्राउंड असलेल्या माण-खटाव या विधानसभा मतदारसंघात त्यांचे एक भाऊ, एक वहिनी पराभूत झाल्या. दुसऱ्या वहिनी सोनल शेखर गोरे या मात्र विजयी झाल्या. 2017 च्या निवडणुकीत भाजपचे सोलापूर झेडपी मध्ये अवघे सात सदस्य होते. ते आता 38 झाले आहेत. शिवाय काँग्रेस आणि उद्धवशेनेला एक जागा देखील जिंकता आली नाही हे दुर्दैव. सोलापूर जिल्हा परिषदेचे अध्यक्षपद हे ओबीसी प्रवर्गासाठी राखीव आहे. आणि प्रथमच जिल्हा परिषद भाजपच्या ताब्यात आली आहे. त्यामुळे अध्यक्ष पद कोणत्या तालुक्याला मिळणार आणि ते कोणाला मिळणार याची उत्सुकता ताणली गेली आहे. ज्यांच्याकडे ओबीसी सर्टिफिकेट असा भाजपचा निवडून आलेला झेडपी सदस्य अध्यक्ष होऊ शकतो. अक्कलकोटचे आमदार सचिन कल्याणशेट्टी यांच्या पत्नीचे ओबीसी सर्टिफिकेट असल्याचे कळते त्यामुळे झेडपी अध्यक्ष पदासाठी त्यांचे नाव येऊ लागले आहे. शिवाय बीबी दारफळ गटातून इंद्रजीत पवार विजयी झाले असून त्यांच्याकडे देखील ओबीसी सर्टिफिकेट असल्याचे सांगण्यात येते. त्यामुळे झेडपीचा अध्यक्ष कोण होईल याची चर्चा आता रंगू लागली आहे