सोलापूर दि. 5 मा. मंत्री कौशल्य रोजगार उद्योजकता व नाविन्यता विभाग महाराष्ट्र राज्य मंगलप्रभात लोढा हे दिनांक 6 जून 2025 रोजी सोलापूर दौऱ्यावर येत असून त्यांच्या उपस्थितीत विविध कार्यक्रमांचे आयोजन पुढीलप्रमाणे
दिनांक 6 जून 2025 सकाळी 10.30 वाजता जिल्हा कौशल्य विकास रोजगार, उद्योजकता मार्गदर्शन केंद्राच्या वतीने मंगळवेढेकर इन्स्टिट्युट, ऑफ मॅनेजमेंट डफरीन चौक येथे रोजगार मेळाव्याचे उद्घाटन मा. मंत्री महोदय यांचे हस्ते होईल. या वर्षापासून राज्यातील सर्व शासकीय औ.प्र. संस्थेमधून मोठ्या प्रमाणावर शिवराज्याभिषेक दिनाचा कार्यक्रम मोठ्या प्रमाणावर साजरा करण्यात येत असून नागरी कर्तव्ये व शिष्टाचार, कुटूंब प्रबोधन, स्वदेशी प्रचार, पर्यावरण संरक्षण व सामाजिक समरसता या पंचपरिवर्तन सुत्रांवर व्याख्यानमालाचे आयोजन करण्यात आले आहे. 6 जून रोजी सकाळी 11.00 वाजता शहरातील हुतात्मा स्मृती मंदिरात मा. मंगलप्रभात लोढा यांच्या उपस्थितीत शिवराज्यभिषेक दिनाचे औचित्य साधून लोणावळा येचील स्तंभकार पंकज जयस्वाल यांचे छत्रपती शिवाजी महाराज व सामाजिक समरसता या विषयावर व्याख्यान होईल. तदनंतर दुपारच्या सत्रात जिल्हा कौशल्य विभागाच्या वतीने जिल्हास्तरीय आढावा बैठकीचे आयोजन करण्यात आले आहे. यानंतर जिल्हाधिकारी कार्यालय येथे विभागाशी संबंधीत समस्या सोडविण्यासाठी जनता दरबाराचे आयोजन करण्यात आले आहे.
राज्यात एकूण 419 शासकीय व 600 हून अधिक खाजगी औ. प्र. संस्था असून सार्वजनिक-खाजगी भागीदारी तत्वावर सर्व शासकीय संस्थांचे टप्याटप्याने जागतिक कौशल्य प्रशिक्षण केंद्रामध्ये रुपांतर करण्याचा सरकारचा मानस आहे. प्रशिक्षणार्थ्यांना अत्याधुनिक दर्जाचे प्रशिक्षण मिळावे याकरिता हा उपक्रम राबविण्यात येणार आहे. याकरिता मा. मंत्रीमहोदय यांनी सोलापूर जिल्हातील विविध खाजगी आस्थापनांना त्यांचा प्रतिनिधीसह आमंत्रित केले असून त्यांना सार्वजनिक-खाजगी भागीदारी योजनेविषयी संपूर्ण माहिती प्रदान केली जाणार आहे. सोलापूर शहर व तालुक्यातील एकूण 150 उद्योजक या बैठकीत हजर राहणार आहेत. अशी माहिती जिल्हा व्यवसाय शिक्षण व प्रशिक्षण अधिकारी एस.आर. भालचिम यांच्याकडून देण्यात आली आहे.
