येस न्युज मराठी नेटवर्क : करोनाच्या संसर्गासोबत दोन हात करत असताना नव्या स्ट्रेनमुळे अनेक देशांची चिंता वाढली आहे. करोनाच्या नव्या स्ट्रेनपासून बचाव करण्यासाठी अमेरिकेने आपल्या नागरिकांना दोन मास्क वापरण्याचा सल्ला दिला आहे. अमेरिकेच्या सेंटर फॉर डिसीज कंट्रोल अॅण्ड प्रीव्हेंशनने (सीडीसी) याबाबतचे निर्देश दिले आहेत.सेंटर फॉर डिसीज कंट्रोल अॅण्ड प्रीव्हेंशनच्या (सीडीसी) अहवालानुसार, डिस्पोजेबल सर्जिकल मास्कवर कपड्याचा मास्क वापरल्यास विषाणूपासून ९५ टक्के अधिक सुरक्षिता मिळू शकणार आहे. सर्जिकल मास्कच्यावर कपड्यांचा मास्क लावल्यास पहिल्या मास्कच्या बाजूने हवा आत जाण्याची शक्यता कमी होते. त्यामुळे मास्क पूर्णपणे फिट असल्याने हवा तोंड, नाकावाटे शरिरात जात नाही आणि त्यामुळे नव्या स्ट्रेनपासून बचाव होऊ शकतो असे नमूद करण्यात आले आहे.सीडीसीचे संचालक रोचेल वार्लेस्की यांनी सांगितले की, मास्कचा वापर अनिवार्य करण्यात आल्यामुळे करोनाबाधितांची संख्या आणि मृत्यू दर कमी झाला आहे.
