झिरो डिफेक्ट सप्लाईज व बेस्ट क्वालिटी सप्लायर ऑफ द ईयर
सोलापूर – प्रिसिजन कॅमशॉफ्ट लिमिटेड या कंपनीला २०२२ मधील व्यवसायिक कामगिरीसाठी टोयोटा मोटर्स कंपनीकडून दोन नामांकित पुरस्काराने सन्मानित करण्यात आले आहे. पहिला पुरस्कार “झिरो डिफेक्ट सप्लाईज” चा आहे, म्हणजेच २०२२ च्या संपूर्ण वर्षात प्रिसिजनने पुरवलेल्या कॅमशाफ्टमध्ये कोणतेही दोष नव्हते, प्रिसिजनने टोयोटा मोटर्सला संपूर्ण २०२२ या वर्षात पुरवठा केलेल्या कॅमशाफ्टमध्ये एकही डिफेक्ट नव्हता. हा पुरस्कार मिळणे हे उत्पादनाच्या गुणवत्तेमध्ये प्रिसिजनचे सातत्य दर्शवते. मागील वर्षात प्रिसिजनने टोयोटा मोटर्स कंपनीला कोणत्याही दोषाशिवाय २ लाख कॅमशाफ्टचा पुरवठा केला आहे.
टोयोटा मोटर्स कंपनीने प्रिसिजनला दिलेला दुसरा पुरस्कार अत्यंत वैशिष्ट्यपूर्ण आणि एकमेव आहे. “बेस्ट क्वॉलिटी सप्लायर” असं या पुरस्काराचं नांव आहे. हा पुरस्कार पुरवठ्यातील सातत्यपूर्ण गुणवत्ता, स्पर्धात्मक किंमत, शून्य अपघात, पुरवठ्यातील शून्य चुका आणि ऑडिटमध्ये एकही चुकीचं निरिक्षण नाही या सर्व निकषांवर दिला जातो. असा पुरस्कार मिळवणारी प्रिसिजन कॅमशाफ्ट्स ही एकमेव पुरवठादार कंपनी ठरली आहे.
प्रिसिजनने मागील ३० वर्षापासून सर्वोत्कृष्ट गुणवत्ता, कस्टमर फोकस कामातील अचूकपणा हीच आपली ओळख बनविली आहे. पॅसेंजर कारच्या कॅमशाफ्ट उत्पादनातील अग्रगण्य उत्पादन कंपनी म्हणून प्रिसिजनची जगात ओळख निर्माण झाली आहे. टोयोटा मोटर्स सारख्या जगविख्यात उद्योग समुहाकडून हा पुरस्कार मिळणे हा फक्त प्रिसिजनचा नाही तर सोलापुरमधील कामगारांचा बहुमान आहे. दि. ८ जून रोजी बेंगलोर येथे पार पडलेल्या समारंभात हा पुरस्कार प्रदान करण्यात आला. प्रिसिजन कंपनीच्या वतीने कंपनीचे क्वालिटी हेड श्री गणेश चिंताकिंदी यांनी हा पुरस्कार स्विकारला.
