नवी दिल्ली : स्वदेशी निर्मितीची पहिली विमानवाहक युद्धनौका INS विक्रांत लवकरच भारतीय नौदलात सामील होण्याची शक्यता आहे. या युद्धनौकेची बेसिन चाचणी यशस्वीपणे पूर्ण करण्यात आली आहे. ऑगस्ट महिन्याच्या पहिल्या आठवड्यात ही युद्धनौका खोल समुद्रात चाचणीसाठी उतरवण्यात येणार आहे. याचं परिक्षण हिंदी महासागरात करण्यात येणार आहे.
परिक्षण पूर्ण झाल्यानंतर ही युद्धनौका चीनी समुद्राच्या सीमा रेषेजवळ तैनात करण्यात येणार आहे. त्यामुळे आता चीनचे मनसुबे चालणार नाहीत. नौदलाच्या सूत्रांनी दिलेल्या माहितीनुसार, स्वदेशी निर्मितीची पहिली महाकाय युद्धनौका INS विक्रांतचे काम पूर्ण झाले आहे. पण रणभूमीवर तैनात करण्यापूर्वी करण्यात येणार औपचारीक परिक्षण बाकी आहे. पुढच्या महिन्यात जेव्हा ही युद्धनौका खोल समुद्रात परिक्षणासाठी उतरवली जाईल, तेव्हा पूर्ण क्षमतेनं याचं परिक्षण केलं जाणार आहे. यासाठी जास्तीत जास्त तीन ते सहा महिन्यांचा कालावधी लागू शकतो. खरेतर, योजनेनुसार ही युद्धनौका रणभूमीवर उतरवण्यासाठी तीन वर्षांचा विलंब झाला आहे. समुद्रातील चाचण्या पूर्ण झाल्यानंतर, कोचिन शिपयार्ड ही युद्धनौका भारतीय नौदलाकडे सोपवणार आहे. यानंतर भारतीय नौदल देखील काही प्रमुख चाचण्या करणार आहे. त्यानंतर ही युद्धनौका चीनी समुद्र सीमेवर तैनात करण्यात येणार आहे. सर्वकाही अपेक्षेप्रमाणं घडलं तर 2022 च्या मध्यापर्यंत ही महाकाय युद्धनौका भारतीय नौदलाच्या ताब्यात सामील होण्याची शक्यता आहे.
