संस्था, मंडळे अन नागरिकांनी सहभागी होण्याचे आमदार देवेंद्र कोठे यांचे आवाहन
सोलापूर :सोलापूर महानगरपालिकेतर्फे मंगळवारी (दि.२४) सकाळी ७ ते ९ या वेळेत खंदक बगीचा आणि हुतात्मा बगीचा येथे महास्वच्छता अभियान राबविण्यात येणार आहे. या स्वच्छता अभियानात सोलापूर शहरातील विविध संस्था, मंडळे आणि नागरिकांनीही सहभागी व्हावे, असे आवाहन आमदार देवेंद्र कोठे यांनी केले आहे.
आमदार आपल्या भेटीला उपक्रमांतर्गत आमदार देवेंद्र कोठे यांनी शहरात भेटी देत असताना लोकसभागातून स्वच्छता अभियानांचे आयोजन करण्याची संकल्पना मांडली होती. या संकल्पनेला विविध भागातील नागरिकांनी जोरदार प्रतिसाद देत या आवाहनात मोठ्या संख्येने सहभागी होण्याची इच्छा व्यक्त केली होती.
खंदक बागेतील भेटी दरम्यान नागरिकांनी तेथील दुरवस्थेची माहिती आमदार देवेंद्र कोठे यांना दिली होती. त्यावेळी आमदार देवेंद्र कोठे यांनी सोलापूर महानगरपालिकेचे अतिरिक्त आयुक्त रवी पवार यांना याबाबत माहिती देऊन येथील स्वच्छतेबाबत सूचना केल्या होत्या. परंतु बर्ड फ्ल्यू च्या साथीमुळे बागा ४५ दिवस बंद करण्यात आल्या. त्यामुळे आता मंगळवारी हे महास्वच्छता अभियान राबविण्यात येणार आहे.
सोलापूर महानगरपालिकेच्या माध्यमातून पहिल्या टप्प्यात शहरातील उद्याने आणि त्यानंतर शहरातील विविध भागांमध्ये स्वच्छता अभियान राबविण्यात येणार आहे. मंगळवारी सोलापूर महानगरपालिकेच्या वीर सावरकर जलतरण तलावाशेजारील खंदक बागेत तसेच जिल्हा मध्यवर्ती बँकेसमोरील हुतात्मा बागेत महास्वच्छता अभियान होणार आहे.
महास्वच्छता अभियानात सहभागी व्हा !
मंगळवारी होणाऱ्या महास्वच्छता अभियानात सोलापूरकरांनी मोठ्या संख्येने सहभागी व्हावे. सोलापूर शहर स्वच्छ व सुंदर बनविण्यासाठी प्रत्येकाने आपले योगदान द्यावे.
