सांगली : ‘बिजलीमल्ल’ अशी ख्याती असलेले भाजपचे ज्येष्ठ नेते संभाजी पवार यांचे निधन झाले. संभाजी पवार हे सांगलीचे माजी आमदार होते. वयाच्या 80 व्या वर्षी त्यांनी अखेरचा श्वास घेतला. प्रतिस्पर्धी मल्लाला कुस्ती सुरु होऊन डोळ्याचे पाते लवते न लवते तोच धोबीपछाड देण्याची खासियत असणारे ‘बिजली मल्ल’ संभाजी पवार यांचे रविवारी रात्री उशिरा निधन झाले.
‘वज्रदेही मल्ल’ हरी नाना पवार यांचे पुत्र म्हणून महाराष्ट्राला त्यांची ओळख झाली. मात्र एकाहून एक सरस कुस्त्या क्षणार्धात निकाली लावण्याची त्यांची खासीयत असल्यामुळे ‘बिजली मल्ल’ म्हणून ते प्रसिद्ध झाले. महाराष्ट्रासह कर्नाटक, पंजाब, हरियाणा या राज्यांमध्ये त्यांचा मोठा चाहता वर्ग होता. याच क्रीडा कामगिरीच्या जोरावर त्यांनी राजकीय क्षेत्रातही नशीब आजमावले.
