सोलापूर प्रतिनिधी दि.७ : बाभळगाव (ता.मोहोळ) शिवारातून चंदनाची झाडे तोडून लाकडे पेनूर येथे विक्रीसाठी आलेल्या दोघांना पोलीस पथकाने पकडून २ लाख ८५ हजार रुपयांचा मुद्देमाल जप्त केला असून यासंबंधी चौघांवर गुन्हा दाखल केला करण्यात आला आहे. ही घटना शुक्रवारी दुपारी दीडच्या दरम्यान घडली. मोहोळ- पंढरपूर रोडलगत पेनूर हद्दीमध्ये चंदन खरेदी चालू असल्याची माहिती पोलिसांना मिळाली होती.
त्यानुसार स्थानिक गुन्हे शाखेचे सहायक पोलीस निरीक्षक रवींद्र मांजरे, सहायक फौजदार महमद मुजावर, पोलीस कर्मचारी नारायण गोलेकर, अक्षय दळवी, धनराज गायकवाड, समीर शेख, पितांबर शिंदे, दळवी यांच्या पथकाने छापा टाकला असता लंकेश्वर अभिमान काळे ( वय २३ ), अमोल अशोक काळे ( वय २०, दोघे रा. यल्लमवाडी ) हे आढळून आले . त्यांच्याकडे २ लाख ८५ हजार रुपयांचा मुद्देमाल मिळून आला. त्यांच्याकडे पोलिसांनी चौकशी केली असता रमेश आप्पाराव चवरे ( वय ४०, रा. पेनूर ) यास चंदन विकण्यास आलो असल्याचे सांगितले.
चवरे याची चौकशी केली असता त्याने सांगितले की, विकत घेतलेली चंदनाची लाकडे पुढे बिनू बळीराम दाढे ( रा. वाफळे ) यास विकत असल्याचे सांगितले आहे. त्यानुसार वरील चौघांवर मोहोळ पोलिसात गुन्हा दाखल केला आहे. याबाबत पोलीस कर्मचारी धनाजी गाडे यांनी फिर्याद दिली आहे. पुढील तपास पोलीस नाईक अमोल घोळवे करीत आहेत.
