तुळजापूर – आज 28 जानेवारी 2023 शनिवार, माघ महिन्याच्या शुक्ल पक्षातील सप्तमी आहे, यालाच रथसप्तमी असे म्हणतात. यानिमित्त तुळजाभवानी मातेच्या सिंहासनावर महाअलंकार पूजा मांडण्यात आली होती. श्रीतुळजाभवानी मातेच्या सिंहासनावर वर्षभरातून तीन वेळा रथ अलंकार महापूजा मांडण्यात येते. दैत्याचा संहार केल्याबद्दल भगवान सूर्यनारायणांनी श्री देवीस त्रिलोक भ्रमणासाठी आपला रथ दिला. दैत्याच्या संहाराच्या प्रसंगाची आठवण म्हणून तुळजाभवानी मातेची रथ अलंकार महापूजा बांधली जाते अशी आख्यायिका आहे. सूर्यदेवाच्या रथातील सात घोडे आठवड्याचे सात दिवस दर्शवतात. त्यामुळेच आज या दिवसाच्या निमित्ताने तुळजामातेची रथअलंकार महापूजा केली जाते. रथसप्तमीनिमित्त राज्यभरातून आज लाखो भाविकांनी तुळजाभवानी मातेचं दर्शन घेतलं.
