सोलापूर विद्यापीठातर्फे ऑनलाईन कार्यशाळा संपन्न
सोलापूर, दि.27- महिलांना केवळ महिला दिनादिवशी सन्मान देऊन चालणार नसून तर कायमस्वरूपी महिलांना आदराची वागणूक देण्याची जबाबदारी ही पुरुषांची आहे. महिलांच्या सन्मानाविषयी पुरुषांची सकारात्मक मानसिकता हवी, असे मत कॅक्ट्स फाऊंडेशनच्या संचालिका तथा मानसोपचार तज्ञ नुसरत खान पहाडे यांनी व्यक्त केले.
शुक्रवारी, पुण्यश्लोक अहिल्यादेवी होळकर सोलापूर विद्यापीठातील अंतर्गत तक्रार निवारण समिती व कॅक्ट्स फाउंडेशन यांच्या संयुक्त विद्यमाने एका विशेष कार्यशाळेचे ऑनलाईन पद्धतीने आयोजन करण्यात आले होते. यावेळी पहाडे या बोलत होत्या. या कार्यक्रमाच्या अध्यक्षस्थानी कुलगुरू डॉ. मृणालिनी फडणवीस या होत्या. यावेळी प्र-कुलगुरू डॉ. देबेंद्रनाथ मिश्रा, प्रभारी कुलसचिव डॉ. विकास घुटे, मानवविज्ञान विद्याशाखेचे अधिष्ठाता डॉ. विकास कदम, आयक्यूएसी विभागाचे संचालक डॉ. व्ही. बी. पाटील यांची प्रमुख उपस्थिती होती. प्रारंभी कार्यक्रमाचे प्रास्ताविक डॉ. प्रकाश व्हनकडे यांनी केले.
पहाडे म्हणाल्या की, आज समाजात महिलांवर व लहान मुलांवर अत्याचाराचे प्रमाण वाढले आहे. देश प्रगतीकडे वाटचाल करीत असताना देखील समाजात वाईट घटना घडत आहेत, या खूपच निंदनीय असून यासाठी समाजाची मानसिकता बदलायला हवी, असे मत त्यांनी यावेळी व्यक्त केले.
कुलगुरू डॉ. फडणवीस म्हणाल्या की, युवती व महिलांवर अत्याचार होऊ नये, यासाठी सर्वांनी काळजी घेणे आवश्यक आहे. महिलांना सन्मान देणे गरजेचे आहे, तरच देशाची प्रगती होणार असल्याचेही मत त्यांनी यावेळी स्पष्ट केले. यावेळी त्यांनी प्रतिज्ञेचेही वाचन केले. यावेळी तक्रार निवारण समितीच्या अध्यक्षा डॉ. मीना गायकवाड, सदस्या डॉ. शोभा राजमान्य, ऍड. नीता मंकणी यांनीही आपले मनोगत व्यक्त केले. या ऑनलाईन कार्यक्रमास डॉ. श्रीराम राऊत व प्रा. सी. जी. गार्डी यांचे तंत्र सहाय्य लाभले.
