येस न्युज मराठी नेटवर्क : राज्यात करोनाचा संसर्ग मोठ्याप्रमाणावर वाढत आहे. मुंबई, पुणे, नागपूर नाशिक, औरंगाबाद सारख्या शहारांमध्ये मोठ्यासंख्येने करोनाबाधित आढळून येत आहेत. या पार्श्वभूमीवर आता प्रशासनाकडून निर्बंध अधिकच कडक केले जात आहेत. मुंबईतील करोनाबाधितांची वाढती संख्या पाहता, आता मुंबई महापालिकेने एक मोठा निर्णय घेतला आहे. उद्यापासून मुंबईत नाईट कर्फ्यू घोषित करण्यात आला आहे. महापौर किशोरी पेडणेकर यांनी याबाबत माहिती दिली आहे. तर, राज्यात करोनाशी संबिधत घालण्यात आलेले निर्बंध १५ एप्रिलपर्यंत वाढवण्यात आलेले आहेत.
”आम्ही पाहत आहोत, ज्या सोसायटींमध्ये पाच पेक्षा अधिक करोनाबाधित आढळतील, त्या सोसायटी सील केल्या जाणार आहे. झोपडपट्टी व चाळींमध्ये मोठ्यासंख्येने करोना पॉझिटिव्ह रूग्ण आढळून येत आहेत. तर, नाईट कर्फ्यूमध्ये पब आणि हॉटेल्स बंद राहणार आहेत. केवळ अत्यावश्यक सेवा सुरू राहतील.” अशी माहिती महापौर किशोरी पेडणेकर यांनी दिली आहे.
