सोलापूर: आपला माणूस आपल्यासाठी या ब्रीद वाक्याखाली ३१ ऑगस्ट मुक्ती दिनानिमित्त नऊ समाज बांधवाचा झेंडा वंदन व आनंदोत्सव कार्यक्रम घेण्यात येणार आहे. नियोजित सर्वोदय समाज मागासवर्गीय गृह निर्माण सहकारी संस्था यांच्या मार्फत घरकुल योजनेचे मोफत फॉर्म वाटप देखील होणार आहे.
भटक्या विमुक्त जमाती गावोगाव फिरून कामे करीत आणि आपला उदरनिर्वाह करीत. पण त्यांच्या कामाचा मुख्य भर परंपरेने समाज जागरण हाही होताच. लोक कला व लोक गीताच्या माध्यमातून हिंदू संस्कृतीच्या इतिहास प्रत्येक पिढीपर्यंत कोणी पोहचवला असेल तर त्यात भटक्या समाजाचा मोलाचा वाटा होता. हा समाज आपली उपजीविका करता करता राम-रावण, कृष्ण- कंस, देव-दानव यांच्या कथा भारुड व गोंधळाच्या माध्यमातून आपल्यावर ब्रिटिश कसे अन्याय करताहेत हे सर्व समाजाला अप्रत्यक्षपणे सांगत होता. तथापि शिकलगर, वडार, फासेपारधी, कैकाडी, वैदू, कोल्हाटी, बेरड, बेस्तर, रामोशी, वासुदेव अशा कितीतरी भटक्या विमुक्त जमातींना ब्रिटिश धोरणामुळे गावगाडा व्यवस्था बिघडल्याने उपजीविकेचा प्रश्न निर्माण झाला. यातून निर्माण झालेल्या असंतोषाने इंग्रज विरोधी आंदोलनांमध्ये या जमातींनी आपला प्रत्यक्ष सहभाग नोंदवला.
हा कार्यक्रम ३१ ऑगस्ट २०२४ रोजी सकाळी १०.०० वा. सेटलमेंट फ्री कॉलनी नं. ६, मराई मंदिर (पिवळा मंदिर) सोलापूर येथे ह.भ.प. सद्‌गुरु शिवलाल महास्वामी महाराज, सोलापूर शुभहस्ते व ह.भ.प. अत्युत मोफरे महाराज, सोलापूर ह.भ.प. नागा गायकवाड महाराज, सोलापूर यांच्या प्रमुख अतिथी मध्ये होणार आहे.या कार्यक्रमाचे मुख्य आयोजक मुख्य प्रवर्तक, भारत माणिक जाधव व संचालक मंडळ असून सर्वांनी उपस्थित राहण्याचे आव्हान अध्यक्ष भारत जाधव आणि राम गायकवाड यांनी केले आहे.
