‘प्रिसिजन’च्या सीएसआर निधीतून शाळांना ‘सॅनिटरी नॅपकिन्सचे व्हेंडिंग व डिस्पोजल मशीन्स’
सोलापूर : प्रिसिजन उद्योगसमूहाच्या सीएसआर निधीतून शिक्षिका व विद्यार्थिनींसाठी सॅनिटरी नॅपकिन्स व्हेंडिंग मशीन व इन्सिनरेटर (डिस्पोजल मशीन) बसविण्यात आले आहेत. सोलापूर विद्यापीठ तसेच दहा शाळांमधील १७८० पेक्षाही अधिक विद्यार्थिनींना याचा लाभ मिळणार आहे.
प्रिसिजन फाउंडेशनच्या अध्यक्षा डॉ. सुहासिनी शहा यांच्या प्रमुख उपस्थितीत शनिवारी दि. २० फेब्रुवारी रोजी या मशीन्सचे लोकार्पण झाले. लिमयेवाडी येथील सोनामाता विद्यालयात झालेल्या या कार्यक्रमास डॉ. उमा प्रधान, डॉ. नभा काकडे हे मान्यवर उपस्थित होते. मासिक पाळीदरम्यान सॅनिटरी नॅपकिन्स वापरून स्वच्छतेचा जागर करण्याचा निर्धार या वेळी उपस्थित शिक्षिकांनी व्यक्त केला.
प्रिसिजन फाउंडेशनने फॅमिली प्लॅनिंग असोसिएशन ऑफ इंडियाच्या सहकार्याने ‘सर्वंकष लैंगिक शिक्षण’ उपक्रमाच्या माध्यमातून २०१८ सालापासून पाच हजारांपेक्षाही अधिक शालेय विद्यार्थिनींचे मासिक पाळीबद्दल प्रबोधन केले होते. याचाच पुढचा टप्पा म्हणून सोलापूर शहर परिसरातील आर्थिकदृष्ट्या दुर्बल मुलींच्या शाळेत त्यांच्या दैनंदिन वापरासाठी हे सॅनिटरी नॅपकिन्सचे मशीन्स उपलब्ध करून देण्यात आले आहेत, असे डॉ. सुहासिनी शहा यांनी सांगितले.
लाभार्थी संस्थांमध्ये सोलापूर विद्यापीठ, लालबहादूर शास्त्री विद्यालय (सत्तरफूट रोड), मागासवर्गीय मुलींचे वसतीगृह (एम्प्लॉयमेंट चौक), सोनामाता विद्यालय (लिमयेवाडी), न. फू. शहा-कोठारी विद्यालय (कुमठा नाका), वसंतराव नाईक प्रशाला (सदर बझार), श्री समर्थ विद्यामंदिर (शास्त्री नगर), श्री साईबाबा प्रशाला (जुने विडी घरकूल), श्री शंकरलिंग महाविद्यालय (वळसंग), समाधान प्रशाला (दहिटणे), सावित्री कन्या प्रशाला (रानमसले) यांचा समावेश आहे.
यावेळी प्रिसिजन उद्योगसमूहाच्या जनसंपर्क विभागाचे माधव देशपांडे, आदित्य गाडगीळ, स्नेहा सपकाळ, सोलापूर विद्यापीठाच्या सिनेट सदस्य अश्विनी चव्हाण, सोनामाता विद्यालयाच्या सुवर्णा अत्रे, फॅमिली प्लॅनिंग असोसिएशनचे विरेंद्रसिंह परदेशी, मागासवर्गीय मुलींच्या वसतीगृहाच्या अधीक्षक सुहासिनी कुलकर्णी यांच्यासह सोलापूर विद्यापीठ तसेच लाभार्थी शाळांमधील शिक्षक, शिक्षिका उपस्थित होत्या.
सॅनिटरी नॅपकिन्स मशीनची वैशिष्ट्ये
प्रिसिजन उद्योगसमूहाने सोलापूर विद्यापीठात सहा तर दहा शाळांमध्ये प्रत्येकी एक याप्रमाणे सोळा संच बसविले आहेत. प्रत्येक संचात एक व्हेंडिंग मशीन व एक डिस्पोजल मशीनचा समावेश आहे. व्हेंडिंग मशीनला इलेक्ट्रिक सप्लायची गरज नसून त्यामध्ये पाच रूपयांचे कॉईन टाकून सॅनिटरी नॅपकिन घेता येतो. व्हेंडिंग मशीनमध्ये एकावेळी पन्नास सॅनिटरी नॅपकिन्सची क्षमता आहे. नॅपकिन्सचे रिफिलिंग वगळता या मशीनला कोणताही मेंटेनन्स नाही. इन्सिनरेटर अर्थात डिस्पोजल मशीनला इलेक्ट्रिक सप्लायची आवश्यकता असून त्यामध्ये एकावेळी जास्तीतजास्त तीन नॅपकिन्स जाळले जाऊ शकतात. याप्रमाणे दिवसभरात जास्तीत जास्त पंचवीस वेळा ही मशीन बर्निंगसाठी वापरली जाऊ शकते. दैनंदिन वापराच्या दृष्टीकोनातून या दोन्ही मशीन्स अत्यंत यूजर फ्रेंडली व अत्यल्प मेंटेनन्स असणार्‍या आहेत.
