नंदीग्राम : पश्चिम बंगालमध्ये नंदीग्राम भागात निवडणूक प्रचारसाठी पोहचलेल्या मुख्यमंत्री ममता बॅनर्जी या गंभीर जखमी झाल्या आहेत. ममता बॅनर्जी यांच्या पायाला दुखापत झाली आहे. उपचारासाठी ममतांना रात्री १३० किलोमीटर दूर कोलकाताच्या एसएसकेएम रुग्णालयात दाखल करण्यात आलं. ममता बॅनर्जी यांचे पुढच्या दोन दिवसांचे कार्यक्रम रद्द करण्यात आले आहेत. याच दरम्यान केंद्रीय निवडणूक आयोगानं राज्य निवडणूक अधिकाऱ्यांकडे घटनेवर विस्तृत अहवालाची मागणी केली आहे. उद्या (शुक्रवारी) सायंकाळी ५.०० वाजेपर्यंत अहवाल देण्याचे निर्देश देण्यात आले आहेत.
पायाला-खांद्याला जखमा
डॉक्टरांच्या म्हणण्यानुसार, ममता बॅनर्जी यांच्या पायाला, खांद्याला आणि गळ्यावर जखमा आहेत. तसंच त्यांच्या डाव्या पायाच्या हाडालाही गंभीर दुखापत झाली आहे. पाय सुजलेल्या अवस्थेत आहे. त्यांनी श्वासोच्छवास घेण्यात अडथळे येत असल्याचंही म्हटलंय. यासाठी मुख्यमंत्र्यांना पुढच्या ४८ तासांसाठी देखरेखीखाली ठेवण्यात येणार आहे. डॉक्टरांनी ममतांना जवळपास दीड महिने आराम करण्याचा सल्ला दिला आहे.
