अहमदाबाद : करोना साथीच्या काळात अहमदाबादमधील भगवान जगन्नाथ यांची १४४ वी पारंपारिक रथ यात्रा निघणार आहे. यावेळी कर्फ्यू लावण्यात येणार आहे. यात्रेत केवळ ३ रथ आणि २ वाहने असतील. १९ किमी मार्गासाठी रथ यात्रेला परवानगी देण्यात आली आहे.
त्याचबरोबर प्रसाद वाटप होणार नाही. गुजरातचे गृहमंत्री प्रदीपसिंग जडेजा यांनी याबाबत माहिती दिली. गुजरातचे गृहमंत्री प्रदीपसिंग जडेजा म्हणाले की, कोविड प्रोटोकॉलचे पालन करत रथयात्रा आखाडा, भजन मंडळाशिवाय दुपारपर्यंत निघेल. लोकांचा भगवान जगन्नाथांवर खूप श्रद्धा आणि विश्वास असल्याचे जडेजा म्हणाले. करोनामुळे गेल्यावर्षी रथयात्रा निघू शकली नाही. दरम्यान, आता राज्यातील कोरोनाची दुसरी लाट पूर्णपणे नियंत्रित आली आहे. त्यामुळे करोना निर्बंधांचे पालन करत रथयात्रा काढण्यात येईल. “रथ यात्रा १२ जुलै रोजी सकाळी निज मंदिर येथून सुरू होईल आणि सकाळी ७ ते दुपारी २ या वेळेत पूर्ण होईल. या वेळी भाविकांना रथ यात्रेमध्ये भाग घेता येणार नाही. त्याचवेळी लोक दूरदर्शन व टीव्ही वाहिन्यांमधून रथ यात्रेचे दर्शन घेऊ शकतात. तसेच रथ यात्रेच्या सुरक्षेसाठी एसआरपीच्या २० तुकड्या तैनात असतील.” असे, जडेजा म्हणाले.
