सोलापूर : स्मृती ऑरगनिक्स लिमिटेड या कंपनीकडून पेंटाप्रोझाईल सोडियम एक हजार किलोग्रॅम खरेदी करून या व्यवहाराचे पैसे न दिल्याने हैदराबाद येथील वेदप्रकाश व्यास आणि ज्योती व्यास या दोघांविरुद्ध सदर बाजार पोलीस ठाण्यात गुन्हा दाखल करण्यात आला आहे. विजय रामचंद्र चांगले यांनी फिर्याद दिली असून सदर बझारचे पोलीस सब इन्स्पेक्टर मतदार अधिक तपास करीत आहेत.
भाजी घेताना खिशातील मोबाईल लंपास
सोलापूर : जुळे सोलापूर येथील डी मार्ट जवळ भाजी खरेदी करत असताना नरसिंग जंबय्या माढेकर यांच्या खिशातील मोबाईल चोरून नेल्याची फिर्याद विजापूर नाका पोलीस ठाण्यात करण्यात आली आहे. याप्रकरणी पोलीस नाईक भीमदेव अधिक तपास करीत आहेत.
गुरुवार पेठेत लोखंडी गेट उघडून चोरी,१ लाख ४० हजारांचे दागिने लंपास
सोलापूर : गुरुवार पेठ येथील आप्पा हलवाई चे बोळात योगीनाथ मल्लिनाथ नंदुरे यांच्या घरातील बाहेरून असलेले लोखंडी गेट उघडून पहिल्या मजल्यावरील खोलीतील कपाटाची झडप उघडून लॉकरमधील १ लाख ४० हजार रुपयांचे दागिने चोरण्यात आले आहेत. याप्रकरणी योगीनाथ नंदुरे यांनी फिर्याद दिली आहे. जेलरोड पोलिस ठाण्याचे पोलिस नाईक पवार अधिक तपास करीत आहेत.
पतीकडून मारहाण झाल्याची विवाहितेची तक्रार
सोलापूर : विजापूर रस्त्यावरील कोळी समाज सोसायटीतील तृप्ती विशाल कोळे यांनी माहेरून पैसे घेऊन ये , असे सांगून मारहाण झाल्याची तसेच गळा दाबल्याची फिर्याद पती विशाल सुनिल कोळे आणि द्राक्षायणी सूनील कोळे यांच्याविरुद्ध केली आहे. पति विशाल याने परस्त्रीशी संबंध ठेवल्याने त्याबाबत विचारणा केली असता मारहाण झाल्याचे फिर्यादीत म्हटले आहे. याप्रकरणी विजापूर नाका पोलीस ठाण्याचे सहाय्यक फौजदार वाल्मीकी तपास करीत आहेत.
शिवीगाळ व मारहाण करून खिशातील सोळाशे रुपये जबरदस्तीने पळविले
सोलापुर : स्वागत नगर येथील मरकज मेडिकल दुकानाजवळील मेजबान हॉटेल समोर चहा घेण्यासाठी गेले असताना समीर रफिक फुलारी यांच्या खिशातील १६०० रुपये बळजबरीने काढून घेतल्याची फिर्याद एमआयडीसी पोलिस ठाण्यात करण्यात आली आहे. पप्पू उर्फ स्वप्नील लोखंडे याने त्याचे साथीदारांसह समीर याच्याकडे येऊन दारू पिण्यासाठी पैशाची मागणी केली. त्यानंतर शिवीगाळ करून व मारहाण करून खिशातील पैसे पळविल्याचे समीर फुलारी यांनी तक्रारीत म्हटले आहे. याप्रकरणी सहायक पोलिस निरीक्षक खांडेकर अधिक तपास करीत आहेत.
