समता, ज्ञान आणि प्रबोधनाचा होणार जागर
सोलापूर – पुण्यश्लोक अहिल्यादेवी होळकर सोलापूर विद्यापीठ येथील भारतरत्न डॉ. बाबासाहेब आंबेडकर अध्यासन केंद्र यांच्यावतीने भारतरत्न डॉ. बाबासाहेब आंबेडकर यांच्या जयंतीनिमित्त दि. ८ ते १४ एप्रिल २०२६ या कालावधीत विविध सामाजिक, शैक्षणिक आणि प्रबोधनपर उपक्रमांचे भव्य आयोजन करण्यात आले आहे. या उपक्रमांमुळे विद्यापीठ परिसरात समता, बंधुता आणि सामाजिक जागरूकतेचा संदेश दिला जाणार आहे.
विद्यापीठाचे कुलगुरू प्रा. डॉ. प्रकाश महानवर, प्र-कुलगुरू प्रा. डॉ. लक्ष्मीकांत दामा, भारतरत्न डॉ. बाबासाहेब आंबेडकर अध्यासन केंद्राचे अध्यक्ष राजाभाऊ सरवदे, प्रभारी कुलसचिव डॉ. अतुल लकडे, अध्यासनाचे समन्वयक डॉ. गौतम कांबळे यांच्या मार्गदर्शनाखाली या सप्ताहाचे आयोजन करण्यात आले आहे. या कार्यक्रम मालिकेची सुरुवात बुधवार, ८ एप्रिल रोजी सकाळी ११ वाजता भारतीय संविधानाच्या प्रस्ताविकेचे सामूहिक वाचन आणि सप्ताहाच्या उद्घाटनाने होणार आहे. याच दिवशी ज्ञानस्रोत केंद्रात ग्रंथ प्रदर्शनाचे उद्घाटन करण्यात येणार असून, हे प्रदर्शन १४ एप्रिलपर्यंत सर्वांसाठी खुले राहणार आहे. विद्यार्थ्यांना आणि संशोधकांना सामाजिक चळवळींचा अभ्यास करण्याची ही उत्तम संधी ठरणार आहे.
९ एप्रिल रोजी राष्ट्रीय सेवा योजनेच्यावतीने संत गाडगे महाराज यांना अभिवादन करण्यात येणार असून, त्यानंतर वृक्षारोपण कार्यक्रम राबविण्यात येईल. पर्यावरण संवर्धनासोबत सामाजिक मूल्यांची जपणूक करण्याचा संदेश यामधून दिला जाणार आहे. याच दिवशी ‘भारतरत्न डॉ. बाबासाहेब आंबेडकर : जीवन व कार्य’ आणि ‘महात्मा ज्योतिराव फुले : जीवन व कार्य’ या विषयांवर निबंध स्पर्धा आयोजित करण्यात आली आहे. १० एप्रिल रोजी विद्यापीठ परिसरात पथनाट्याचे सादरीकरण होणार आहे.
११ एप्रिल रोजी सकाळी 11 वाजता सामाजिकशास्त्रे संकुल सभागृहात महात्मा ज्योतिराव फुले यांच्या जयंतीनिमित्त डॉ. दुष्यंत कटारे यांचे विशेष व्याख्यान आयोजित करण्यात आले आहे. १२ एप्रिल रोजी सलग १८ तास वाचन अभ्यास उपक्रमाचे आयोजन करण्यात आले असून, विद्यार्थ्यांमध्ये वाचन संस्कृती रुजविण्याचा हा अभिनव उपक्रम आहे. १३ एप्रिल रोजी सकाळी 11 वाजता विद्यापीठाच्या मुख्य सभागृहात राज्यसभेचे नूतन खासदार डॉ. ज्योती वाघमारे यांचे विशेष मार्गदर्शनपर व्याख्यान होणार आहे. या सप्ताहाची सांगता १४ एप्रिल रोजी सकाळी ९ वाजता भारतरत्न डॉ. बाबासाहेब आंबेडकर यांच्या जयंतीनिमित्त त्यांच्या प्रतिमेस अभिवादन करून करण्यात येणार आहे. विद्यापीठातील विविध विभागांच्या समन्वयातून आयोजित या कार्यक्रममालिकेत विद्यार्थी, प्राध्यापक आणि नागरिकांनी उत्स्फूर्तपणे सहभागी व्हावे, असे आवाहन आयोजकांनी केले आहे.
