सोलापूर विद्यापीठात छत्रपती शंभूराजे साहित्य पुरस्कारांचे वितरण
सोलापूर, दि. 27- माय मराठी भाषेला हजारो वर्षांची वैभवशाली परंपरा आहे. संत, कवी, लेखक व साहित्यिकांनी ही भाषा समृद्ध केली आहे. आता 21 व्या या शतकातही मराठी भाषेच्या समृद्धतेत दिवसेंदिवस वाढ होत असल्याचे प्रतिपादन महाराष्ट्र साहित्य परिषदेच्या सोलापूर शाखेच्या अध्यक्षा डॉ. श्रुतीश्री वडगबाळकर यांनी केले.
गुरुवारी, पुण्यश्लोक अहिल्यादेवी होळकर सोलापूर विद्यापीठात कुलगुरू प्रा. प्रकाश महानवर यांच्या मार्गदर्शनाखाली ज्ञानपीठ पुरस्काराने सन्मानित कवी कुसुमाग्रज यांच्या जयंतीनिमित्त मराठी भाषा गौरव दिन साजरा करण्यात आला. यावेळी छत्रपती शंभुराजे साहित्य पुरस्कारांचेही वितरण करण्यात आले. यात प्रमुख व्याख्याते म्हणून डॉ. वडगबाळकर या बोलत होत्या. या कार्यक्रमाच्या अध्यक्षस्थानी प्र-कुलगुरू प्रा. लक्ष्मीकांत दामा, कुलसचिव योगिनी घारे, भाषा संकुलाचे संचालक डॉ. गौतम कांबळे यांची प्रमुख उपस्थिती होती. यावेळी वालचंद कला व शास्त्र महाविद्यालयातील डॉ. चंद्रकांत चव्हाण यांना शिक्षक गटातून तर अधिकारी व कर्मचारी गटातून विद्यापीठातील डॉ. शिरीष बंडगर यांना छत्रपती शंभुराजे साहित्य पुरस्कार देऊन सन्मानित करण्यात आले. या कार्यक्रमाचे प्रास्ताविक प्रा. अमोगसिद्ध चेंडके यांनी केले. मान्यवरांचा परिचय श्रुती देवळे यांनी करून दिला. विद्यार्थी विकास विभागाचे संचालक डॉ. केदारनाथ काळवणे यांनी पुरस्काराविषयी माहिती दिली.
डॉ. वडगबाळकर म्हणाल्या की, भाषा ही जगण्यासाठी खूप महत्त्वाची गोष्ट आहे. भाषेकडे जाणीवपूर्वक लक्ष देणे आवश्यक आहे. भाषेमुळे व्यक्तिमत्व विकास घडतो. मराठी भाषा ही विविधतेने नटलेली आहे. संस्कृती टिकण्यासाठी देखील भाषा महत्वाची असते, असे प्रतिपादन देखील त्यांनी यावेळी केले.
प्र-कुलगुरू प्रा. लक्ष्मीकांत दामा म्हणाले की, मराठी भाषेला मोठी परंपरा आहे. आज पंतप्रधान नरेंद्र मोदी सरकारने मराठी भाषेला अभिजात भाषेचा दर्जा देऊन मराठीचा सन्मान वाढविला आहे. मराठी भाषेची गोडी एक वेगळीच असल्याचे प्रतिपादन त्यांनी यावेळी केले. या कार्यक्रमास राज्यपाल नियुक्त व्यवस्थापन परिषदेचे सदस्य प्रा. देवानंद चिलवंत, व्यवस्थापन परिषदेचे सदस्य प्रा. सचिन गायकवाड, डॉ. प्रभाकर कोळेकर, डॉ. राजेंद्र वडजे यांच्यासह शिक्षक, अधिकारी, कर्मचारी, विद्यार्थी मोठ्या संख्येने उपस्थित होते. कार्यक्रमाचे सूत्रसंचालन प्रा. ममता बोल्ली यांनी केले तर आभार प्रा. विद्या काळे यांनी मानले.
सोलापूर : पुण्यश्लोक अहिल्यादेवी होळकर सोलापूर विद्यापीठात कवी कुसुमाग्रज यांच्या जयंतीनिमित्त मराठी भाषा गौरव दिन साजरा करण्यात आला. यावेळी छत्रपती शंभुराजे साहित्य पुरस्कारांचेही वितरण करण्यात आले. याप्रसंगी डॉ. श्रुतीश्री वडगबाळकर, प्र-कुलगुरू प्रा. लक्ष्मीकांत दामा, कुलसचिव योगिनी घारे, भाषा संकुलाचे संचालक डॉ. गौतम कांबळे व अन्य.
