पुणे: कोरोना विषाणू संसर्ग आणि लॉकडाऊनमुळे अनेकांनी रोजगार गमावला. कोरोनाच्या पहिल्या लाटेत आणि दुसऱ्या लाटेत अनेकांनी आपल्या कुटुंबातील प्रिय व्यक्तींना गमावलं आहे. शिवाजी विद्यापीठ, कोल्हापूर आणि मुंबई विद्यापीठापाठोपाठ सावित्रीबाई फुले पुणे विद्यापीठानं फी कपातीचा निर्णय जाहीर केला आहे. तर, कोरोनामुळे ज्या विद्यार्थ्यांनी पालक गमावले आहेत त्यांची 2021-22 या शैक्षणिक वर्षासाठी फी कपातीचा निर्णय व्यवस्थापन परिषदेत घेण्यात आला आहे. विद्यापीठाच्या या निर्णयामुळं विद्यार्थ्यांना दिलासा मिळणार आहे.
संपूर्ण फी माफ
राज्याचे उच्च व तंत्र शिक्षण मंत्री उदय सामंत यांनी विद्यापीठांना फी कपातीसंदर्भात आवाहन केलं होतं. उच्च व तंत्र शिक्षण मंत्रालयाच्या आवाहनाला प्रतिसाद देत सावित्रीबाई फुले पुणे विद्यापीठानं कोरोना विषाणू संसर्गामुळे ज्या विद्यार्थ्यांनी त्यांची आई किंवा वडील या दोघांपैकी आणि दोन्ही पालक गमावले आहेत त्यांना 100 टक्के फी माफ करण्याचा निर्णय घेण्यात आला आहे.
