सोलापूर : देशात उद्योगांची उभारणी होऊन रोजगार निर्मिती व्हावी यासाठी केन्द्र सरकारने लघु आणि मध्यम उद्योग (एम एस एम इ)खात्याच्या माध्यमातून जाहीर केलेल्या विविध योजनांचा लाभ होतकरू उद्योजक तरुणांनी करून घेतला पाहिजे असे आवाहन या खात्याच्या महासंचालक स्वरूपा ग्लोरी यांनी सोलापूर सोशल फाऊंडेशनने आयोजित केलेल्या वेबीनॉरमध्ये बोलताना केले.
केन्द्र सरकार उद्योगांना देत असलेल्या सवलती आणि त्यासंंबंधातल्या योजना यांची माहिती नव्या उद्योजकांना व्हावी यासाठी फाऊंडेशनने हे वेबीनॉर आयोजित केले होते. त्याचे प्रास्ताविक करताना श्रीमती ग्लोरी यांनी हे आवाहन केले. मा. आमदार सुभाषबापू देशमुख हे या वेबीनॉरमध्ये सहभागी झाले होते. अशा प्रकारचे हे देशातले पहिलेच वेबीनॉर होते.
केन्द्र सरकारच्या या मंत्रालयाचे मंत्रिपद नितीन गडकरी यांच्याकडे आहे आणि सरकारने अनेक नवनव्या योजना जाहीर केलेल्या आहेत. त्या उद्योजकांपर्यंत पोचवण्यासाठी अशा प्रकारचे एक दिवसीय जनजागृती कार्यक्रम हाती घेतला जात आहे असे ग्लोरी यांनी सांगितले.
या मंत्रालयाचे संचालक संदीप भटनागर. श्रीकांत शर्मा यांनी अनेक योजनांचे तपशील दिले. पंतप्रधान रोजगार निर्मिती कार्यक्रम, कृषि विकास कार्यक्रम, मुद्रा बँक योजना, सिडबी इत्यादी योजनांचे तपशील त्यांनी दिले. हे मंत्रालय उद्योगांना बाजार सर्वेक्षण करण्यासही मदत करते. त्याचबरोबर उद्योगाच्या व्यवस्थापकीय समस्या सोडवण्यासाठी सल्ला देते अशी माहिती त्यांनी दिली.
ज्या उद्योगाला आपला माल परदेशी निर्यात करावयाचा असेल त्यांना त्या बाबतीत सल्ला आणि मार्गदर्शन करण्याचीही सेवा या मंत्रालयातर्फे दिली जात असते. शिवाय मालाची विक्री वाढावी यासाठी निरनिराळ्या प्रदर्शनांत सहभागी होण्याबाबत मार्गदर्शन केले जाते. प्रशिक्षण आणि तंत्रज्ञान विषयक आधुनिकीकरण या बाबतीत मदत करून त्यासाठी अर्थसाह्यही केले जाते असे शर्मा यांनी सांगितले.
केन्द्र सरकार लहान उद्योगांना अनेक प्रकारची अनुदाने देते. त्या सर्व सबसिड्यांची माहितीही या वेबीनॉरमध्ये देण्यात आली. या वेबीनॉरचा लाभ ९५ उद्योजकांनी घेतला. आमदार सुभाषबापू देशमुख यांनी नव्या उद्योजकांनी नव्या क्षेत्रात पदार्पण करताना विचारपूर्वक पावले टाकावीत अशी सूचना केली. फाऊंडेशनचे संचालक रवीन्द्र मिणियार, अभिजीत पाटील, अमित जैन यांनीही आपली मते मांडली.
बॉबी मेनन, राजेश गोसकी, मुख्य समन्वयक विजय पाटील, समन्वयक विपुल लावंड हे या वेबानॉरमध्ये सहभागी झाले होते.
सदर ऑनलाइन मिटिंगचे रेकॉर्डिंग पाहण्यासाठी सोलापूर सोशल फाऊंडेशन च्या 7767080999 या क्रमांकावर संपर्क साधण्याचे आवाहन करण्यात येत आहे.
