सांगली : आंतरराष्ट्रीय दर्जाची सौंदर्य प्रसाधने, औषधे तयार करण्यासाठी वापरण्यात येणारे खवल्या मांजराची खवले तस्करी पोलिसांनी उघडकीस आणून ११ लाख ८७ हजारांची खवले पोलिसांनी कुपवाडमध्ये जप्त केली. या प्रकरणी दोन तस्करांना अटक करण्यात आली असल्याची माहिती स्थानिक गुन्हे अन्वेषण विभागाचे पोलीस निरीक्षक सतीश शिंदे यांनी बुधवारी दिली.
कुपवाडमधील शिवमुद्रा चौकामध्ये दोन व्यक्ती अत्यंत दुर्मिळ समजल्या जाणार्या खवल्या मांजराची खवले घेऊन विक्रीसाठी येत असल्याची माहिती पोलिसांना मिळाली होती. या माहितीच्या आधारे अधीक्षक बसवराज तेली व निरीक्षक सतीश शिंदे यांच्या मार्गदर्शनाखाली सहायक निरीक्षक संदीप शिंदे, संदीप पाटील, संजय कांबळे, संकेत मगदूम, सुनिल चौधरी, सुधीर गोरे, अमोल ऐदळे, राहूल जाधव, गौतम कांबळे, अजय बेंदरे, संकेत कानडे, ऋषिकेश सदामते, कॅप्टन गुंडवाडे आदींच्या पथकासह मानद वन्यजीवरक्षक अजितकुमार पाटील, वनपाल तुषार भोरे यांच्यासह पाळत ठेवली.
यावेळी इम्रान अहमद मुलाजी (वय ४२ रा.अलोरे ता. चिपळूण) व दिनेश गोपाळ डिंगणकर (वय ४५ रा. चिंद्रवळे ता. गुहागर) यांच्या हालचाली पथकाला संशयास्पद वाटल्या. त्यांना ताब्यात घेऊन झडती घेतली असता पाठीवरील पिशवीमध्ये खवल्या मांजराची ४ किलो ७५० ग्रॅम वजनाची खवले आढळून आली.
गावाकडे रानात मृत झालेल्या खवल्या मांजराची खवले असून ती जादा किंमत मिळते म्हणून विक्रीसाठी आणली असल्याचे संशयितांनी सांगितले.
तांबूस, पांढर्या रंगाचे टणक कवच असलेले अतिशय दुर्मिळ, संरक्षित व नामशेष होत असलेल्या खवल्या मांजराचे खवले हे महागडी औषधे व आंतरराष्ट्रीय दर्जाची सौंदर्य प्रसाधने बनविण्यासाठी वापरले जातात. यामुळे आंंतरराष्ट्रीय पातळीवर खवल्यांना प्रचंड मागणी आहे. याची तस्करी सांगलीतून उघडकीस आली असून, या प्रकरणी औद्योगिक वसाहत पोलीस ठाण्यात गुन्हा दाखल करण्यात आला आहे.
