रात्री PM2.5 चे प्रमाण 493 पर्यंत; सोलापूरकरांनीही घ्यावा पर्यावरणाचा धडा
येस न्यूज नेटवर्क: दिवाळीचा उत्साह आणि फटाक्यांच्या आतषबाजीचा परिणाम देशाच्या राजधानीच्या हवेवर दिसून आला आहे. दिवाळीच्या दिवशी दिल्लीचा वायू गुणवत्ता निर्देशांक (AQI) 376 वर पोहोचला. त्यामुळे दिल्लीतील हवेची गुणवत्ता ‘अतिशय खराब’ श्रेणीत नोंदविण्यात आली.
केंद्रीय प्रदूषण नियंत्रण मंडळाच्या आकडेवारीनुसार, दिवाळीच्या आदल्या दिवशी दिल्लीचा AQI 369 होता. दिवाळीच्या दिवशी तो वाढून 376 वर पोहोचला. विशेष म्हणजे रात्री फटाक्यांची आतषबाजी सुरू झाल्यानंतर प्रदूषणात मोठी वाढ झाली. रात्री 11 वाजता शहरातील सरासरी PM2.5 चे प्रमाण 493.17 मायक्रोग्रॅम प्रतिघनमीटरपर्यंत पोहोचले.
दिल्लीतील जहांगीरपुरी परिसरात PM2.5 चे प्रमाण 4,985 मायक्रोग्रॅम प्रतिघनमीटरपर्यंत नोंदविण्यात आले. ही परिस्थिती हवेतील सूक्ष्म प्रदूषकांच्या गंभीर धोक्याची जाणीव करून देणारी आहे.
दिवाळीपूर्वीच प्रदूषणात 97 टक्के वाढ
Centre for Science and Environment च्या अहवालानुसार, दिवाळीपूर्वीच्या आठवड्यात दिल्लीतील PM2.5 ची सरासरी 236 मायक्रोग्रॅम प्रतिघनमीटर होती. गतवर्षी याच काळात हे प्रमाण 120 होते. म्हणजेच वर्षभरात जवळपास 97 टक्क्यांची वाढ झाली.
सोलापूरकरांनीही घ्यावा धडा!
दिल्लीतील प्रदूषणाची आकडेवारी केवळ राजधानीपुरती मर्यादित नसून सोलापूरसारख्या शहरांसाठीही सावध करणारी आहे. सोलापूरमध्ये वाहनांची वाढती संख्या, रस्त्यांवरील धूळ, बांधकामे आणि औद्योगिक उत्सर्जन यामुळे प्रदूषण नियंत्रणाकडे गांभीर्याने पाहण्याची गरज आहे.
दिवाळीत फटाक्यांचा अतिवापर टाळणे, हवेच्या गुणवत्तेची नियमित तपासणी करणे आणि पर्यावरणपूरक सण साजरा करणे आवश्यक आहे. अन्यथा सणांचा आनंद घेताना नागरिकांच्या आरोग्यालाच धोका निर्माण होऊ शकतो.
